Entant che l'economia apprezieschia il potenzial da spezialists da l'exteriur, vegnian migrants che sa chattian gia daditg en Svizra savens recepids sco «gruppa da problems». Lur potenzials na vegnan savens ni vis ni appreziads.
Svizra ha gia adina profità da migrants
Dasperas possedian blers migrants - gist pervi da lur istorgia - qualitads positivas sco flexibladad, plurilinguitad, forza da persvader e calma, sch'i va per ir enturn cun situaziuns novas e nunenconuschentas.
Dapi si’entschatta haja la Svizra profità da la forza innovativa, dal spert inschignus e da la creativitad da migrants, uschia la cumissiun. Ils potenzials da persunas sajan il chapital d’ina societad.
Cumissiun è cunter iniziativa da la PPS
Sco la Cumissiun federala per dumondas da migraziun ha era communitgà, refusa ella l'iniziativa da la PPS per il repatriament effectiv. Il parlament federal haja chattà ina via d'amez per realisar l'iniziativa per il repatriament. Perquai na saja l'iniziativa per il repatriament effectiv betg necessaria.
Ultra da quai cuntrafetschia il repatriament automatic da esters criminals che l'iniziativa pretendia, tranter auter al principi da la commensurabladad sco era a la convenziun dals dretgs umans.
Davart l'iniziativa per il repatriament effectiv decida il suveran svizzer ils 28 da favrer.
RR novitads 16:00/20:00