Siglir tar il cuntegn

Svizra Repartiziun d'entradas dal traffic public en la critica

La Confederaziun duai pudair influenzar pli fitg co las entradas dad abunaments dal traffic public vegnan repartidas. Quai pretenda il survegliader dals pretschs Stefan Meierhans.

Stefan Meierhans.
Legenda: Il sistem da repartiziun actual na plai betg al survegliader da pretschs. Keystone

Survegliader da pretschs Stefan Meierhans vul refurmar il sistem da la repartiziun d'entradas: La Confederaziun duai pudair influenzar pli fitg co las entradas dad abunaments dal traffic public vegnan repartidas.

In sistem pli transparent

L'entir sistem na saja betg survesaivel. Zunt intransparenta saja la clav da repartiziun d'abunaments sco il Halbtax u il GA. Per il mument haja il stadi nagin'influenza sin quai.

Quai vul Meierhans midar. Cunquai che la Confederaziun è participada fitg a la finanziaziun duai el er avair in'influenza sin la repartiziun da las entradas da quels abunaments.Concret vul il survegliader da pretschs ina nova repartiziun. In criteri duai esser l'augment da custs che las singulas interpresas han.

Intginas interpresas da traffic hajan profità da l'augment da pretschs per abunaments dal traffic public senza d'avair augmentà lur custs.

Abunaments naziunals

200 interpresas profiteschan da las entradas dad abunaments sco il Halbtax u il GA.

Ni l’uniun da traffic ni l’uniun da tariffas han commentà questa proposta. Ellas sajan dentant avertas per discussiun – ha ditg in pledader.

RR novitads 09:00