Siglir tar il cuntegn

Svizra Reparaziun: Uffants plazzads survegnan 300 milliuns francs

Uffants plazzads ed unfrendas da mesiras repressivas preventivas che vivan anc survegnan ina contribuziun solidarica da 300 milliuns francs. Mintg’unfrenda duai survegnir tranter 20’000 e 25’000 francs. L'iniziativa da reparaziun aveva pretendì marcantamain dapli ch'il Cussegl naziunal ha concedì.

Las unfrendas: Uffants plazzads e da chasas d'uffants, internads, sterilisads e dunnas sfurzadas a l'abort.
Legenda: Las unfrendas: Uffants plazzads e da chasas d'uffants, internads, sterilisads e dunnas sfurzadas a l'abort. Keystone/Archiv

Anteriurs uffants plazzads ed ulteriuras unfrendas da mesiras repressivas duain vegnir indemnisads cun 300 milliuns francs. Quai ha decis il Cussegl naziunal cun ina gronda maioritad. La Confederaziun stima il dumber las pertutgads che vivan anc sin 12 fin 15’000 persunas. Mintg’unfrenda survegn uschia stgars 25’000 francs.

Gronda maioritad ha ditg gea

La debatta è stada emoziunala, ma la finala han ils commembers da la Chombra gronda decis cun 142 cunter 26 vuschs (14 abstinenzas) en favur d’ina lescha che lubescha ils pajaments.

A l'elavuraziun da las mesiras repressivas preventivas e plazzaments esters dal 1981 ha il Cussegl naziunal dà il consentiment cun 142 cunter 28 vuschs (10 abstinenzas).

Cuntraproposta aveva pretendì dapli

La lescha è ina cuntraproposta indirecta davart l'uschenumnada iniziativa d'indemnisaziun. Quella ha la medema finamira, pretenda però 500 milliuns francs ed in’elavuraziun scientifica da l'entiert capità.

Ils iniziants aveva però signalisà d'esser pronts da retrair lur iniziativa. En chaussa sto uss anc decider il Cussegl dals chantuns.

RR novitads 10:00