Siglir tar il cuntegn

Svizra Renconuschientscha da la vita cun 38 onns

Claudia Caviezel, dissegnadra da textilias cun ragischs grischunas, ha gudagnà il premi svizzer Grand Prix Design 2016. Quel vegn surdà da l'Uffizi federal da la cultura ils 14 da zercladur.

Claudia Caviezel avant ina da sias ovras plain colurs
Legenda: Claudia Caviezel survegn il premi svizzer Grand Prix Design 2016 BAK
in maletg da claudia caviezel, ina cuntrada surreala, cun fermas colurs, ina pintga vacca
Legenda: In'ovra da Claudia Caviezel BAK

Gudagnar quest premi saja sco la curunaziun da l'ovra da la vita, di Claudia Caviezel. Ella survegn quai premi cun 38 onns, per sias tailas e creaziuns che fan furora sur ils cunfins svizzers. Quai saja ina gronda onur ed ella haja nunditg tschaffen.

Influenza sin il design textil svizzer

Claudia Caviezel saja talentada ed haja ina gronda influenza sin il design textil svizzer actual, scriva la cumissiun federala da design. Era renumads designers sco Louis Vuitton e Vivienne Westwood han gia duvrà tailas da Caviezel per crear vestgadira extraordinaria.

Ina lavur multifara

Tailas, plimatschs, tarpuns, canapés, las lavurs da Caviezel èn multifaras. Quai è quai che fascinescha la designra vi da sia lavur.

Ella possia lavurar cun designers da moda, cun architects, cun designers da products. Impurtant saja, che las textilas sajan da buna qualitad e plain colurs. Textilias vivian da la materialitad.

Tailas pon raquintar istorgias

Fascinada è la designra da textilias veglias, tradiziunalas da l'entir mund, textilias che raquintaun in’istorgia.
Claudia Caviezel creescha per l'ina tailas per la fatschenta Akris a San Gagl. Ella fa dentant era products per Atelier Pfister, plimatschs, resti da letg, canapés. Questas ovras portan tuttas in num grischun, Riom, Marmorera, Mathon. Rumantsch na sa la designra betg pli, malgrà ch'il bab è da Tumegl e la mamma da Sagogn. Ella chapeschia rumantsch, na possia dentant betg pli discurrer.