Siglir tar il cuntegn
cuntegn

Svizra Remplazzar il pastget cun flurs selvadias

Luschards, splers u avieuls – l'existenza da blers animals e bleras plantas è periclitada. Mintgin ch'ha in curtin po però far insatge per promover la diversitad da plantas, insects ed animals.

In prà da fluras cun in spler.
Legenda: La populaziun svizra duai s'engaschar pli ferm per la diversitad biologica en curtin. Keystone

Per il di internaziunal da la biodiversitad emprova la Confederaziun da sensibilisar la populaziun da far dapli per la diversitad biologica era en l’agen curtin. Uschia possian ierts da pastget vegnir remplazzads u cumplettads cun prads da fluras selvadias. E per che animals hajan meglras schanzas da surviver l'enviern, possian ins laschar en lieus quiets la feglia da las plantas giun plaun. Erizuns u auters animalets chattian là in lieu per passentar ils mais fraids.

En general tira il BAFU 25 onns suenter, che la convenziun da l’ONU per la biodiversitad è entrada en vigur, ina bilantscha negativa. Per ina gronda part da tut las sorts e spezias en Svizra stoppian ins il mument far quitads, scriva il BAFU. Tar la medema conclusiun vegnan er las organisaziuns d'ambient. Actualmain stettian mo 6,2% dal terren en Svizra sut protecziun– la finamira internaziunala sajan però 17%.

Di internaziunal da la biodiversitad

Il di internaziunal da la biodiversitad regorda al 22 da matg 1992. Quel di èn ils pajais commembers sa cunvegnids davart il text da la cunvegna da la UNO areguard la diversitad biologica. Radund in onn e mez pli tard è la convenziun entrada en vigur.

La noziun biodiversitad cumpiglia la varietad da las spezias, la varietad genetica sco er la varietad dals ecosistems.

La convenziun ha 196 partenaris ed è vegnida signada da 168 pajais e da l'UE. La Svizra ha ratifitgà la cunvegna il 1994.

RR novitads 07:00