Siglir tar il cuntegn
cuntegn

Svizra Relaziun ambivalenta cun il «chantun grond»

La Svizra e la Germania han stretgas relaziuns economicas e culturalas. Malgrà quai datti adina puspè dispitas.

Bandiera da la Germania e da la Svizra.
Legenda: Bunas relaziuns bilateralas, quai era pervia da l'economia. Keystone

Il president da la Confederaziun, cusseglier federal Alain Berset, beneventa oz ses collega d’uffizi tudestg, il president Frank-Walter Steinmeier a Berna. I dat in bainvegni festiv sin la plazza dal Münster cun militar e musica. E questa saira ina tschaina da gala en il Bernerhof, gist sper la Chasa federala.

Per nus è quella visita uffiziala raschun da dar in'egliada sin la relaziun da la Svizra cun la Germania.

Livio Foffa (RTR): Co statti cun las relaziuns?

Adrian Camartin: Tut ensemen schess jau schon che las relaziuns èn oz in baintant meglras che anc avant paucs onns. Lura dominava la dumonda dal secret bancar e las DC's cun datas da clients da banca che vegnivan cumpradas da differents stadis federativs, las discussiuns bilateralas.

Quai è oz auter. Cunquai che la Svizra ha fatg maisa schubra, betg il davos era pervia dal squitsch da l’exteriur, regia sin quai palc ruaus. E vida quai n’ha era l’affera da spiunadi enturn Daniel Moser betg midà pauc.

RTR: Tuttina han ins mintgatant il sentiment ch'i dettia tranter la Svizra ed il «chantun grond» sco quai che la Germania vegn era numnada mintgatant, tschertas malchapientschas.

Adrian Camartin: En ina relaziun schess'ins probabel: Gl'è cumplitgà.
D'ina vart han la Svizra e la Germania fitg stretgas e bunas relaziuns economicas. Mo in exempel: Cun la Bavaria ed il Baden-Württemberg faschain nus mintga di dapli commerzi che cun l'Indonesia durant in entir onn. Ultra da quai vivan e lavuran da quai da 300'000 Tudestgas e Tudestgs en Svizra. E betg d'emblidar il turissem. Ils osps da la Germania èn cunzunt per il Grischun da grond’impurtanza. ¼ da tut ils osps da vacanzas tar nus èn da la Germania.

Da l'autra vart datti natiralmain era differenzas. In tema che vegn adina puspè è l’eroport da Turitg e la dumonda dals sgols da notg e la canera sur territori tudestg. Ni gist quels dis puspè tut las dumondas enturn las ovras atomaras svizras. Saja quai la dumonda davart in deposit per material radioactiv ni l'ovra atomara Beznau che sa chatta datiers dal cunfin. Dacurt hai dà demonstraziuns.

RTR: Gist qua fiss la visita da Steinmeier ina schanza per reglar l'ina ni l'autra chaussa. U betg?

Adrian Camartin: Talas visitas sco quella dad oz na dastg’ins betg survalitar. I dat qua bain discurs, ma l'entira occurrenza è plitost da muntada simbolica. I vala da rinforzar ils buns contacts e da sincerar in a l'auter l’amicizia.

Malgrà quai speran ins a Berna schon che la visita dal president Frank-Walter Steinmeier po dar in stausch en la dretga direcziun. Per exempel quai che pertutga las negoziaziuns cun l'UE per ina nova cunvegna da basa. Ed en quai connex ha Steinmeier, che ha ditg da sasez ch'el è in «fan da la Svizra» ditg en in’intervista tar ils collegas da SRF ch'el saja da buna speranza ch'i pudessi dar in svilup positiv en quellas negoziaziuns. Sche la politica federala po quintar cun il sustegn da la Germania en quella dumonda, fiss quai schon in grond success.

RR actualitad 12:00