Siglir tar il cuntegn
cuntegn

Svizra Reglas main severas per interpresas da Fintech

Interpresas che cumbineschan servetschs finanzials cun nova tecnologia ston en svizra far lur fatschentas tenor perscripziuns sumegliant severas sco bancas. Quai saja in’auta barriera per novas interpresas, di il Cussegl federal. El vul perquai schluccar las reglas per talas interpresas.

Purtret d'in telefonin cun scrit si "bezahlung erfolgreich".
Legenda: Pajar mobil cun il telefonin. Quai è schon realitad. Keystone

iTunes ni Spotify han midà la moda e maniera co nus tadlain musica ozendi. Grazia a la digitalisaziun sa mintg'in tadlar dapertut e da tuttas uras la musica preferida, e quai per paucs daners.

In sumegliant svilup datti ussa tar las bancas. Era qua procura la digitalisaziun per novas furmas co nus pajain ni investin noss daners il futur. Da quai svilup duai era la Svizra profitar. Il Cussegl federal vul perquai crear ina regulaziun nova per promover il svilup da talas interpresas en Svizra.

I saja impurtant da procurar per cundiziuns da basa ch'èn amiaivlas per l'innovaziun. Il Cussegl federal ha perquai fixà las valurs directivas ed ha incumbensà il departament da finanzas da formular in text da consultaziun en chaussa.

Las fatschentas da Fintech sviluppeschan applicaziuns per pajar mobil, programmeschan valurs da facultad ni arvan plattafurmas per crowdfunding.

RR actualitad 12:00