Siglir tar il cuntegn
cuntegn

Svizra Register naziunal da cancer spustà, però betg dustà

Il register naziunal da cancer va en vigur pir il 2020 – pia in onn pli tard che previs oriundamain. Uschia vul il Cussegl federal dar als chantuns la pussaivladad da sa preparar meglier sin il sistem da registrar ils cas da cancer.

det che mussa sin in purtret da röntgen
Legenda: Cun in register cumplet e standardisà duai la prevenziun vegnir meglierada e la perscrutaziun duai vegnir promovida. Keystone

En il parlament è il project stà incontestà: Tut ils cas da cancer en Svizra duain vegnir tschaffads en in register – cumplet e standardisà. Il potenzial d'in tal register saja grond, è la maioritad dal parlament stada d'accord. Era las associaziuns da cassas da malsauns, da la protecziun da pazients e dals medis beneventan in tal register. Tar ils chantuns frunta il project però sin opposiziun.

Differents chantuns crititgeschan il register. Quel giaja memia lunsch e custia memia bler. Il ristg saja ch'i dettia la finala in register cun datas che saja plitost in deposit. Ils chantuns quintan cun custs supplementars da 20%. Il niz dal register na cumpenseschia betg ils custs.

Meglra prevenziun e perscrutaziun

Cun il register duai la prevenziun al cancer sa meglierar, ed ins spera da pudair diagnostitgar a temp la malsogna, uschia ch'ins pudess la tractar meglier. Quai tenor l'Uffizi federal per sanadad. Era la perscrutaziun duai profitar dal register tschaffà en ils chantuns e manà ensemen sin plaun naziunal.

Pazientas e pazients duain però avair il dretg da veto. Quai munta ch'i pon pretender da betg vegnir tschaffads. Mintg'onn vegnan diagnostitgads radund 40'000 novs cas da cancer e radund 17'000 persunas moran mintg'onn da la malsogna.

RR novitads 17:00