Las regenzas dals chantuns refusan cleramain l'iniziativa No Billag. Sch'ella vegnia approvada, vegnia la cuntrada mediala en Svizra donnegiada fitg ferm, scriva la Conferenza da las regenzas chantunalas en ina communicaziun. Tenor la conferenza vegnissan en spezial las minoritads linguisticas e las regiuns periferas e muntagnardas dischavantagiadas tar in'approvaziun.
Iniziativa memia radicala
L'iniziativa saja memia radicala e vegnia perquai refusada dals chantuns. Tar las medias electronicas stuess ins abolir il service public. Tras quai giess ina «purschida d'infurmaziuns multifara ed independenta» a perder. Quella saja però impurtanta per ina furmaziun da l’opiniun democratica ed in process da furmaziun da la voluntad.
Davart l'iniziativa No Billag, che vul abolir las taxas per radio e televisiun, vegn votà ils 4 da mars 2018.
RR novitads 15:00
