Il glindesdi da Tschuncaisma è la Rega vegnida alarmada da la polizia chantunala dal Soloturn: In raivider era crudà radund 20 meters en terren mal accessibel en la Balmflue.
Localisaziun via colliaziun telefonica
La posiziun exacta dal raivider grev blessà n’era l’emprim betg enconuschenta. La Rega ha dentant pudì far ina conferenza da telefon tranter l’accumpagnader dal raivider, il pilot ed il manader da l’acziun ed uschia localisar la posiziun.
La Rega ha pudì salvar il raivider en in’acziun cun in turn. Silsuenter ha ella sgulà il blessà en l’ospital.
Dumber d’acziuns ordinari
Radund 50 giadas è il helicopter da la Rega sa mess en acziun durant Tschuncaisma. La mesadad dals cas eran da natira d’urgenza medicinala per persunas malsaunas. Pervi da l’aura maschadada è il dumber d’acziuns tenor la Rega da valitar sco ordinari.