Siglir tar il cuntegn
Inhalt

Svizra Refurma da taglia III – Maurer laschà sulet da ses votants

Tenor la retschertga da la chasa editura Tamedia han refusà las votantas ed ils votants da las partidas sanestras ensemen cun la basa burgaisa la refurma da taglia sin interpresas III.

Ueli Maurer pensiv.
Legenda: Laschà sulet da ses votants - tenor la retschertga hajan 53% dals votants e las votantas da la PPS votà cunter il project da lur cusseglier federal Ueli Maurer. Keystone

La gronda part da la basa da las partidas burgaisas n’è betg suandada a las parolas da lur partidas, concluda l’enquista da la Tamedia, ch’è vegnida publitgada il mardi.

Uschia han las votantas ed ils votants da la PPS ditg per 53% «na» al project da votaziun da lur cusseglier federal Ueli Maurer. ll pli cler verdict è vegnì dals votants da la BPD: Els han refusà cun 79% la refurma da taglias. Ferma saja stada dentant er la resistenza tar ils votants da la partida verd liberala (69% na) e da la PCD (59% na).

Sulettamain votantas e votants da la basa da la partida liberal- democratica hajan sustegnì per gronda part la refurma – uschia hajan 67% dad els votà gea la fin d’emna passada.

L’enquista è vegnida fatga tranter ils 10 e 12 favrer cun 13’437 participantas e participants tenor variablas demograficas, geograficas e politicas. Tenor ils auturs da l’enquista saja la quota da sbagls statistics tranter plus e minus 2,4%.

RR novitads 09:00+