Siglir tar il cuntegn
Inhalt

Svizra Refurma da rentas – la discordia en il parlament cuntinua

Il Cussegl naziunal resta dir en la debatta davart la refurma da las rentas: El ha vuschà anc ina giada cun 103:92 vuschs cunter la decisiun dal Cussegl dals chantuns dad augmentar l’AVS per 70 francs.

El discurra en il parlament.
Legenda: Cusseglier federal Alain Berset (PS) s'engascha anc ina giada per sia refurma da las rentas. Keystone

La dumonda da l’augment è l’ultima differenza impurtanta tranter las duas chombras parlamentaras.

Impurtanta na l’ultim perquai ch’ella ha il potenzial da sbuvar l’affar cumplet. En la chombra pitschna è la maioritad da PS e PCD persvadida, ch’ina proposta senza l’augment n’haja nagina schanza tar il suveran.

Cussegl naziunal resta dir er tar la uschenumnada regla da stabilisaziun

Quella regla prevesa, che la vegliadetgna da renta va automaticamain sin fin a 67 onns sche l'Assicuranza per vegls e survivents daventa deficitara. Parallel s'augmenta la taglia sin la plivalur per fin a 0,4 pertschient. Cun 100 cunter 89 vuschs e 5 parlamentaris, ch’èn s’abstegnids da vuschar, ha il Cussegl naziunal decidì da vulair questa regla.

La refurma sto ir tras en la sessiun da primavaira

La proposta va uss danovamain al Cussegl dals chantuns. Quel tracta ella l’emna proxima per returnar l’affar en la terza emna da la sessiun anc ina giada al Cussegl naziunal.

Fin a la fin da la sessiun da primavaira ha il parlament da sa cunvegnir – uschiglio savess la refurma far naufragi. Al mument datti anc grondas differenzas tar la refurma da las rentas.

RR novitads 12:00++