Siglir tar il cuntegn
cuntegn

Svizra Refurma da rentas – gronda differenza tranter las duas chombras

Il Cussegl dals chantuns vul per mintga pretsch evitar che la refurma da las rentas fa naufragi en la votaziun. El tegna vid ses concept d'auzar novas rentas da l'AVS per 70 francs e d'auzar las rentas per conjugals. Uschia vul il cussegl gulivar sperditas ch'èn previsas en la segunda pitga.

Davart la refurma da rentas na sa cunvegnan las duas chombras betg.
Legenda: Co guarda or il futur da persunas en pensiun? Davart la refurma da rentas na sa cunvegnan las duas chombras betg. Keystone

Il Cussegl dals chantuns ha mess ulteriurs terms sin via a la refurma da la prevenziun per la vegliadetgna.

70 francs al mais dapli per novas rentas d’AVS

La Chombra pitschna insista sin in augment sin novas rentas d’AVS da 70 francs per mais. A medem mument vul el auzar il supplement da rentas da conjugals da 150 sin 155%.

Uschia vul il Cussegl dals chantuns egualisar sperditas che resultan dal sbassament da la quota da la lescha federala davart la prevenziun professiunala. Quella resultass en ina reducziun da las rentas da 12%. Il supplement vegniss finanzià cun 0,3 ulteriurs procents da paja.

Differenzas davart vegliadetgna da renta

Il Cussegl dals chantuns affirmescha il proceder tar la vegliadetgna da renta 65 e tar la vegliadetgna da renta flexibla a partir da 62. El è uschia da medem avis sco il Cussegl naziunal.

Dentant refusa il Cussegl dals chantuns il mecanissem d’intervenziun dal Cussegl naziunal. El na vul betg che la vegliadetgna da renta vegn auzada sin 67 onns, sch’il fonds da l’AVS croda sut 80% da las expensas annualas. Er l’augment da la taglia sin plivalur da 0,4% colliada cun quai refusa il Cussegl dals chantuns.

Confederaziun na duai betg pajar pli autas contribuziuns

Areguard ina pli auta contribuziun da la Confederaziun a l’AVS na suonda il Cussegl dals chantuns betg al Cussegl naziunal. Quella engrevgiass las finanzas federalas per 270 milliuns francs.

Las rentas da vaivas ed uffants na vul il Cussegl dals chantuns betg midar.

La fatschenta va uss enavos al Cussegl naziunal. En la sessiun da primavaira sto il parlament lura sa cunvegnir definitiv.

RR novitads 14:00