Siglir tar il cuntegn

Header

cuntegn

Svizra Refurma da rentas - ed uss?

Ella ha fatg ina tura enorma: Ella è ida envi ed ennà, ella è vegnida adattada ed ella ha procurà per lingias grassas a sfratg. Ed uss po ella far ina pitschna pausa. Il parlament ha dà glisch verda a la refurma. Ma cun quai n'è il viadi da la refurma anc ditg betg a fin.

audio
Gea a refurma da rentas - ed uss?
ord Actualitad dals 16.03.2017.
laschar ir. Durada: 2 minutas 55 Secundas.

La proxima fermada da la refurma ha num votaziuns. Nus Svizras e Svizzers avain l'ultim pled.

Or da las debattas en il parlament han ins badà ch'i va per ina chaussa emoziunala, e nagin n'ha prendì il maun avant la bucca. Precis uschè pudess vegnir il cumbat electoral.

Martin Candinas
Legenda: Martin Candinas Keystone
Diversas uniuns da purs e da gastronomia vegnan segir er a sa maschadar en il cumbat electoral, tant pli dir vegnia ad esser.
Autur: Martin Candinas Cusseglier naziunal PCD

Da l’avis ch'i vegn a dar in dir cumbat è er il cusseglier naziunal Heinz Brand. Dentant na vegn el insumma betg a sustegnair la refurma – cuntrari.

Heinz Brand
Legenda: Heinz Brand Keystone
Questa refurma è mo «Pflästerlipolitik»! Ma il suveran duai decider...
Autur: Heinz Brand Cusseglier naziunal PPS

Per u cunter la refurma: I sto vegnir persvas – quai che vegn ad esser ina da las grondas sfidas cunquai che la refurma è fitg cumplexa. Igl è ina refurma nua ch'er ils politichers s'han mors ora il dents.

  • Dunnas duain lavurar fin 65.
  • Novs pensiunaris duain survegnir 70 francs dapli AVS.
  • Per finanziar l'AVS duai la taglia sin la plivalur vegnida augmentada per 0,6%.
  • Quant che duai vegnir pajà or da la cassa da pensiun mintga mais. Il mument èn quai 6,8%. En il futur duain quai anc esser 6%.

Dentant Silva Semadeni na fa betg quitads per quai. Ella è da buna speranza ch'ins possia declerar bain la chaussa a mintgina e mintgin.

Silva Semadeni
Legenda: Silva Semadeni Keystone
Nus stuain far cler a tuts ch'i vul questa refurma e che quai è mo il cumenzament da midaments en chaussa rentas.
Autur: Silva Semadeni Cussegliera naziunala PS

Gea, declerar ston ins quai en mintga cas, di Magdalena Martullo-Blocher, dentant uschè che la glieud chapescha era che la refurma sco quai ch'ella è uss na porta nagut.

Magdalena Martullo-Blocher
Legenda: Magdalena Martullo-Blocher Keystone
Ins viva schon cun quai, betg tant ditg e betg tant bain. Ma sch'il suveran di: meglier quai sco nagut, lura è quai halt uschia.
Autur: Magdalena Martullo-Blocher Cussegliera naziunala PPS

Conscient a tuts è che sch'i dat ina midada, lura n'è la renta anc betg salvada. I vul anc autras mesiras. Ina che vegn segir puspè ad esser tema è d'auzar la vegliadetgna da pensiun.

Duri Campell
Legenda: Duri Campell Keystone
Auzar la vegliadetgna è il pass logic. Nus vegnin adina pli vegls e pajain adina pli tard, perquai che nus faschain pli ditg scolaziuns.
Autur: Duri Campell Cussegl naziunal PBD

Uschia che la dumonda co salvar las rentas na piglia anc ditg betg ina fin. Sche tut va tenor plan, lura vegnin nus a votar ils 24 da settember davart la refurma.

Artitgels legids il pli savens