Siglir tar il cuntegn

Svizra Refurma d'imposiziun da taglia sin interpresas III: Emprim pass

Il Cussegl dals chantuns ha approvà la refurma da l’imposiziun da taglia sin interpresas 3. Quai cun 31 cunter 9 vuschs. Il project è impurtant per il futur da la Svizra sco plazza economica. Ils chantuns duain sbassar la taglia da gudogn per interpresas. Uss va la refurma en il Cussegl naziunal.

Eveline Widmer-Schlumpf pleda en la sala dal Cussegl dals chantuns
Legenda: La ministra da finanzas partenta durant la debatta davart la taglia sin interpresas. Keystone

Oz profiteschan interpresas internaziunalas cun sez en Svizra da reglas da taglia spezialas. Sin gudogns che quellas interpresas fan en l’exteriur pajan ellas pli pauca taglia che sin gudogns ch'ellas fan en Svizra. Mo sin squetsch da l'UE e da l'Organisaziun da cooperaziun e svilup economic en Europa (OECD) sto la Confederaziun ussa chalar cun quels privilegis, per evitar da vegnir sin glistas nairas e vegnir sancziunada.

Per che las interpresas che profiteschan oz da quels privilegis na bandunan betg la Svizra propona il Cussegl federal la lescha davart la refurma da l'imposiziun da taglia sin interpresas 3. Plinavant duain els introducir ina uschenumnada “boxa da patentas”. Interpresas che fan perscrutaziun ed innovaziuns duain stuair pajar damain taglia sin quai ch’ellas gudognan cun lur patents.

La consequenza da quellas mesiras è dentant ch’i vegn a dar grondas sperditas da taglia tar la Confederaziun ed ils chantuns. Plinavant duai la Confederaziun sustegnair finanzialmain, cun ina cumpart pli gronda da la taglia federala directa. Malgrà quels daners supplementars èsi cler ch’ils chantuns vegnan a stuair spargnar.

Quai na plai betg a la sanestra che la refurma vegni realisada cun damain sperditas per ils chantuns. Era las interpresas ed ils aciunaris stoppian contribuir insatge. Sche betg ha la partida socialdemocrata gia annunzià ch’ella vegni a prender il referendum cunter la lescha davart la refurma da l'imposiziun da taglia sin interpresas 3.