Siglir tar il cuntegn

Header

cuntegn

Svizra Record d'exports per la Svizra

Ils exports da la Svizra èn danovamain creschids l’emprim quartal da quest onn, e quai per 0,2%. Quai munta in nov record d’exports d’ina summa da passa 57 milliardas francs, communitgescha l’administraziun federala da duana.

Surtut è vegni exportà dapli en l’america dal nord ed en l’Europa. Dapi la fin dal 2016 mussan tut ils products in trend positiv.

Ils imports èn creschids per 4,1%, quai communitgescha l’administraziun federala da duana. Uschia vegn quai tar la pli pitschna differenza da la bilantscha commerziala dapi plirs onns, scriva l’administraziun. Il surpli tar la bilantscha commerziala munta a 6,5 milliardas francs.

Exports d'uras èn creschids

La branscha da chemia e farma è la pli gronda sparta d'export ed ha pudì exportar en quest quartal 0,7% dapli. Ils exports d'uras èn creschids per 4,9%. Il nivel è dentant restà sut il maximum. Ils exports da maschinas, electronica ed instruments da precisiun èn stagnads.

Geograficamain ha la Svizra exportà dapli en tut ils trais martgads principals. Il pli bler en l'America dal nord, cun in augment da 3,9%. Per 1% èn creschids ils exports en l'Europa e per 0,9% en l'Asia. Quest trio ha importà rauba da la Svizra per 500 milliuns dapli che l'onn avant.

Ils exports en Gronda Britannia èn sa sminuids per 410 milliuns francs e quels en Frantscha per 222 milliuns.

Imports da farma e chemia sco motor

Ils imports èn s'augmentads en trais da las quatter gruppas da rauba. 85% u 1,7 milliardas francs dapli han products da chemia e farma fatg ora. Els èn creschids per 14,7% e cun quai sin in nov record. En tut ha la Svizra importà rauba per 51 milliardas francs.

RR novitads 10:00

Artitgels legids il pli savens