Siglir tar il cuntegn
Inhalt

Svizra Reacziuns sin l'elecziun da Guy Parmelin

Ils presidents da las ulteriuras partidas en il parlament sur dal nov Cusseglier federal dal Vad Guy Parmelin. Cunzunt Toni Brunner è satisfatg e vesa potenzial en Svizra franzosa. Per ils candidats perdents n’èsi er nagina fin dal mund.

Toni Brunner e Guy Parmelin.
Legenda: Toni Brunner e Guy Parmelin èn satisfatgs da las elecziuns. Keystone

La partida populara Svizra ha in represchentant el Cussegl federal da la Svizra romanda. Ils presidents da las partidas spetgan bler dal nov cusseglier federal.

Il president da la partida populara Toni Brunner era fitg cuntent cun l’elecziun da Parmelin. Uschia vesa el en la Svizra franzosa grond potenzial per futurs electurs da la PPS. Ed er la concordanza saja uss puspè garantida, ha ditg Brunner. Cun Parmelin saja in um el Cussegl federal che conuschia bain ils dossiers.

Aeschi fiss gugent vegni cusseglier federal

Ils ulteriurs candidats per il Cussegl federal da la PPS èn sa mussads sco fairs perdents. Il fiss gugent vegnì cusseglier federal e avess er gugent fatg insatge per noss pajais, ha ditg Thomas Aeschi candidat dal chantun Zug.

L’ulteriur candidat Norman Gobbi dal chantun Tessin ha accentuà che la candidatura haja avert in nov mund ad el, el returnia rinforzà el Tessin. Viavant ha Gobbi ditg ch’el speria dentant ch’il Tessin vegnia uschè spert sco pussaivel ad esser represchentà el Cussegl federal.

Christian Levrat n'è betg propi satisfatg

Christian Levrat, il president da la Partida socialdemocratica, n'è betg intgantà da l'elecziun dal nov cusseglier federal. El tema che la PPS vegnia er cun dus sezs en la regenza a cuntinuar da far opposiziun.

Ils burgais èn pli optimistics

Pli optimistic sa mussan la PLD e la PCD. La PPS stoppia uss surpigliar responsabladad per ils basegns da l'entira populaziun svizra, ha ditg il president da la PLD Philipp Müller.

Da maniera sumeglianta è s'exprimì ses collega d'uffizi da la PCD, Christophe Darbellay. Tenor el vegnia Parmelay però ad avair bregia en l'avegnir da collavurar cun l'atgna partida.

Reacziuns grischunas sin l'elecziun da Parmelin

Il no cusseglier federal dal chantun Vad Guy Parmelin succeda ad Eveline Widmer-Schlumpf en in Cussegl federal. Uschia n'ha il Grischun e l’entira Svizra orientala nagin represchentant pli en la regenza.

Las reacziuns grischunas sin l'elecziun dal candidat da la PPS èn tuttina per gronda part positivas.