La reducziun da las premias duai vegnir augmentada per 30%. Quai pretenda la Protecziun svizra dals consuments. Il Cussegl federal duai far quai immediat cun in'ordinaziun d'urgenza. I sa tracta da la dumonda che persunas che na gudognan betg uschè bler pon far en ils chantuns per betg stuair pajar uschè autas premias.
Cunquai ch'er ils pretschs per energia e consum creschian, saja l'annunzia d'auzar las premias per las cassas da malsauns ina frida e per bleras chasadas betg supportabla.
I dovra er in fonds da salvament per las consumentas e consuments e betg mo per concerns sco l'Axpo.
La critica sa drizza er vers la politica: Dapi onns blocheschian lobists en il parlament federal mesiras per franar ils custs da sanadad ubain che las propostas vegnian spustadas.
Er la Caritas dat en la medema crenna: Reducziuns da premias sajan in'impurtanta mesira per cumbatter la paupradad. Quest instrument saja da schlargiar per dischargiar famiglias e persunas cun paucas entradas.
L'Uniun da medias e medis è da l'avis ch'in tal augment da las premias na fiss betg necessari, sch'i fiss gartegià da refurmar il sectur da sanadad. Dapi onns vegnia la discussiun da tariffas dentant bloccada.
Las interpresas da sanadad da la Svizra Ospita pretendan in stop da regulaziun tar ils fatgs da sandadad. La politica da fin qua cun raziunaments e scumonds en ils secturs staziunars ed ambulants n'hajan strusch mussà effect.
L'Associaziun dals ospitals e l'Associaziun da las cassas da malsauns Santésuisse pretendan ulteriuras schliaziuns da finanziaziun. I saja da quintar ch'il squitsch politic sin ils custs da sanadad creschia vinavant - quai che fetschia grev d'adattar las tariffas. Uschia che la branscha dad ospitals e clinicas stettia avant ina gronda sfida ch'ella na possia probabel betg dumagnar ord atgna forza.
Las partidas politicas van d'accord che las premias na pon betg crescher ad in crescher e propageschan lur ideas:
- L'Allianza dal Center vul in levgiament per famiglias e persunas cun entradas bassas e pretenda reducziuns da premias temporaras
- La Partida socialdemocratica fa attent sin sia iniziativa che pretenda che nagina chasada svizra duai pajar dapli che 10% da las entradas per premias
- La Partida verda pretenda ina midada da sistem davent da las premias per persuna tar ina premia dependenta da las entradas
- La Partida liberaldemocratica propona mesiras sin il martgà, per exempel cun ina concurrenza tranter ils purschiders da sanadad.
