Rapport davart Bodluv: Indiscreziuns han chaschunà il naufragi

Il mars aveva Cusseglier federal Guy Parmelin sistì andetgamain las lavurs d'evaluaziun per cumprar in nov sistem da defensiun cunter aviuns. Ina gruppa d’inquisiziun ha preschentà las conclusiuns ch'il project saja stà sin buna via. Tuttina saja la decisiun da sistir l'evaluaziun chapaivla.

Kurt Grüter.

Legenda da maletgs: Kurt Grüter il responsabel per la cumissiun d'inquisiziun instradada dal Departament da defensiun. Keystone

Falliments chastiabels n’haja el betg chattà. A quella conclusiun vegn Kurt Grüter en ses rapport. Tenor l'anteriur directur da la controlla da finanzas federala, saja il project per l'evaluaziun d'in nov sistem da defensiun cunter aviuns, numnà BODLUV, stà manà bain ed a moda correcta. Las perscripziuns internas dal Departament da defensiun sajan vegnidas resguardadas. Fatg naufragi haja il project pia betg pervia da sbagls da la gestiun mabain pervia da las indiscreziuns, di Grüter.

Indiscreziuns han purtà la fin dal project

La fin da mars aveva il Cusseglier federal Guy Parmelin sistì il project. Avant e suenter eran documents confidenzials vegnids purtads a las medias che mussavan ch'ils dus models da rachetas che l'armada era vid evaluar n’ademplivan betg ils criteris fixai.

Kurt Grüter vegn dentant a la conclusiun ch'ins haja da lez temps insumma anc buc pudì decider sche las rachetas hajan in «No-Go», vul dir sch'ellas sajan vairamain betg adattadas.

Naginas raschuns objectivas per sistir il project

«I na deva nagins No-Gos che avessan pretendì da interrumper l’acquisiziun. Ins leva testar las rachetas cun ils sensurs e cun ils radars e pir lura avess ins pudì valitar la prestaziun da quellas», ha ditg Grüter. Raschuns objectivas per sistir il project n’existivan perquai betg. Malgrà quai sappia el chapir che Cusseglier federal Parmelin haja tratg in stritg.

Il clima politic n’era betg pli adattà

«Il naufragi dal Gripen, las discussiuns enturn il camiun Duro, la vista generala cun il nov aviun e lura questas indiscreziuns. El n’aveva betg pli la suveranitad d'interpretar. Il project fiss fugì ad el or da maun e perquai ha el ditg stop, ussa vi jau far ina bilantscha da la situaziun», ha accentuà Parmelin.

Megliurar la communicaziun

Per il futur vesa Grüter dentant potenzial per meglierament. Cunzunt tar la communicaziun, saja quai intern entaifer l'armada sco era extern. A l'armada na saja betg gartegià da persvader la politica sco era la publicitad da l'impurtanza dal project BODLUV. I dovri perquai dapli transparenza e la politica stoppia vegnir integrada pli baud en talas evaluaziuns.

Parmelin vul uss analisar

Cuort suenter la preschentaziun dal rapport ha era il Cusseglier federal Guy Parmelin prendì posiziun avant las medias. El prendi per enconuschientscha las cussegliaziuns, ins vegni ad analisar quellas da rudent.

Il project BODLUV resti vinavant sistids. El vegli l’emprim spetgar il rapport intern cun la vista generala davart la defensiun cunter aviuns avant ch'el decidi co cuntinuar.

RR actualitad 17:00