Suenter la critica en la consultaziun ha il Cussegl federal preschentà in rapport da segirtad surlavurà. En quel ha el actualisà ils temas terrorissem dschihadistic e migraziun.
Terror, attatgas da cyber e Russia
Uschia ha Parmelin accentuà ch’il privel da terror per la Svizra saja sa pegiurà marcant. Motiv saja la situaziun geopolitica sco la milissa da terror stadi islamic en Siria, Libia ni en l’Irac.
Ultra da quai sajan attatgas da cyber in privel latent e da prender serius, ha ditg Parmelin. Betg mo las pussaivladads tecnologicas sajan sa midadas ma er l’infamadad da tscherts pajais da nizzegiar quellas. Ed er la relaziun dals stadis dal vest e la Russia saja ina nova realitad per la politica da segirtad. Il conflict en l’Ucraina dal ost haja mussà che cunfins internaziunals na vegnian betg pli resguardads, ha accentuà Parmelin.
Sa cumprovada è la rait da segirezza
La rait naziunala da segirezza ch’è vegnida lantschada il 2010 saja sa cumprovada. Uschia sajan las smanatschas sa midadas marcantamain, uschia scriva la regenza svizra. Ils privels sajan vegnids anc pli cumplex, colliads anc pli ferm in cun l'auter ed anc pli nunsurvesaivels.
Il Cussegl federal fa en intervals regulars rapports da segirtad. L'ultim era vegni fatg il 2010.
RR novitads 15:00