Siglir tar il cuntegn

Header

cuntegn

Rapport cumissiun da gestiun Procedura d'evaluaziun per F-35 era legitima ma betg adequata

Il rapport da la cumissiun da gestiun dal cussegl naziunal è finalmain vegnì publitgà venderdi suentermezdi. La cumissiun crititgescha il cussegl federal e scriva che la procedura d'evaluaziun era bain legitima ma betg adequata. Il cussegl federal saja sa tegnì vi da las reglas ma haja restrenschì sia libertad d'agir davent da l'entschatta a moda nunnecessaria.

Critica per il Cussegl federal

La finamira da la cumissiun era dad analisar ils criteris per la cumpra da l'aviun da cumbat american F-35. La cumissiun n'haja betg chattà negligientschas relevantas cun l'evaluaziun da l'Uffizi federal da l'armament (Armasuisse). Ella valitescha dentant la deliberaziun suandanta dal Cussegl federal e dal Departament federal da defensiun (VBS) da Viola Amherd sco «per part betg adequata».

Uschia n'haja il Cussegl federal betg laschà spazi per evaluar interess da la politica exteriura per la cumpra dal jet. Tenor rapports da medias franzosas vess la Frantscha vulì sustegnair la Svizra en tractativas cun l'UE en cas d'ina cumpra da jets franzos.

Cun as metter quella prescripziun haja il Cussegl federal ristgà dissonanzas cun auters pajais, crititgescha la cumissiun.

Communicaziun insuffizienta da Viola Amherd

Er la communicaziun da cussegliera federala Viola Amherd vegn crititgada en il rapport. Ella haja infurmà il rest dal Cussegl federal sur da lur spazi d'agir en maniera cuntradictorica. Ella haja en pli er infurmà ils auters departaments memia tard sur dals resultas da l'evaluaziun tecnica.

Tut en tut scriva la cumissiun da gestiun dal Cussegl naziunal però l'evaluaziun saja stada legitima e las reglas sajan vegnidas resguardadas.

audio
Per tadlar: curt e compact
ord RTR Audio dals 09.09.2022.
laschar ir. Durada: 13 minutas 2 Secundas.

RTR novitads 17:00

Artitgels legids il pli savens