Siglir tar il cuntegn
cuntegn

Svizra Rapinà ina Svizra en il Sudan

Il departament federal dal exteriur ha confermà il rapiment da la dunna svizra en la regiun da crisa Darfur en il Sudan. Ella viva gia dapi onns en il Sudan e lavura per l'agid umanitar.

Schuldà cun ina arma.
Legenda: Dapi 14 onns cumbattan a Darfur rebells cunter la regenza (maletg d'archiv). Keystone

La represchentanza svizra en il Sudan haja contact cun las autoritads localas ed i dettia scleriments, ha ditg il pledader dal departament a radio SRF. La Svizra pretendia che la dunna vegnia libra immediatamain e senza cundiziuns.

Dapi onns en il Sudan

Tenor indicaziuns da l'agentura da novitads sda sa tracti d'ina dunna che lavura dapi onns en il Sudan per l'agid umanitar. Ella s'occupa d'uffants a Darfur. Ella saja vegnida rapinada datiers da sia abitaziun en il nord da Darfur. La dunna lavura betg directamain cun las Naziuns Unidas dentant tar bleras occasiuns ensemen cun ellas.

En la regiun da crisa Darfur regna dapi 14 onns in conflict tranter l'armada dal Sudan e rebels. Tenor indicaziuns da l'ONU èn dapi il 2003 gia dapli che 300'000 pesunas vegnidas mazzadas e dapli che 2,5 milliuns persunas èn fugidas dals cumbats.

RR novitads 06:00