Cun 138 cunter 11 vuschs e 30 abstenziuns ha suenter il Cussegl dals chantuns ha era il Cussegl naziunal approvà il credit. Ils daners servan al manaschi ed al mantegniment da l'infrastructura da las viafiers.
Dapli custs datti cunzunt perquai che adina dapli e pli grevs trens curseschan sin la rait svizra. Plinavant dovri adattaziuns en favur da las persunas cun impediments.
Era dapli daners per la Viafier retica
La Viafier retica survegn da quel credit per ils onns 2017 fin 2020 860 milliuns francs da la Confederaziun. Quai è la summa ch'ella aveva dumandà. Il motiv per il sustegn finanzial augmentà sajan las restauraziuns da pliras construcziuns sco punts, tunnels e galarias. Il pli grond project vegn ad esser la construcziun dal nov tunnel da l’Alvra.
En congual cun ils quatter onns precedents èn quai passa 100 milliuns dapli. Oriundamain era previs per ils onns 2013 fin 2016 in sustegn da 660 milliuns, pervia ulteriuras investiziuns sco tranter auter in project da tut las societads da trens da binaris stretgs che la Viafier retica maina è questa contribuziun dentant vegnida augmentada per 85 milliuns francs.
RR novitads 10:00++