- L'examinaziun independenta da l'èra Vincenz ha chattà nagins indizis sin cumportaments chastiabels.
- Dentant ha ella chattà manglaments gravants en l'acquisiziun ed il management da participaziuns.
- Raiffeisen ha annunzià in pachet da mesiras cumplessiv. Trais commembers da la direcziun bandunan per immediat la banca.
Gabriele Burn e Beat Hodel hajan il glindesdi dat giu lur funcziun per immediat, scriva la banca Raiffeisen il mardi en ina communicaziun. Er Paulo Brügger haja declerà sia demissiun sco commember da la direcziun per immediat. Uschia hajan tut ils commembers da la direcziun ch'eran gia part dal gremi avant il 2015 – pia en la èra da l'anteriur schef da la banca Pierin Vincenz – bandunà la banca.
Medemamain ha il secretari general, Roland Schaub, dat giu ses post per immediat. Gia avant aveva il manader da la banca, Patrik Gisel, bandunà ses post. Gisel era onns a la lunga stà il numer dus da la banca ed aveva lura surpiglià la successiun da Pierin Vincenz.
I dovria uss ina nov'entschatta per pudair cuntinuar cun las sfidas ed incumbensas da Raiffeisen Svizra, uschia vegn cità il nov schef da Raiffeisen, Heinz Huber. L'evaluaziun da pussaivels successurs vegnia instradada, fin là vegnian las funcziuns mintgamai surpigliadas da substituts.
Examinà fatschentas da participaziuns
L'examinaziun dal professer d'economia, Bruno Gehrig, ha prendì sut la marella las fatschentas da participaziuns che la Raiffeisen Svizra e sias filialas avevan cumprà sut l'anteriur schef, Pierin Vincenz. Gehrig n'ha betg chattà mussaments che Vincenz, anteriurs u actuals organs sajan sa cumportads relevant al dretg penal u s'enritgids persunalmain. Dentant èn quels fatgs che vegnan gia investigads da la Procura publica stads exclus da l'examinaziun.
Percunter ha Gehrig constatà ch'il cussegl d'administraziun e la direcziun han fatg sbagls gravants en lur lavur da manar la banca – quai areguard la strategia da diversificaziun, nua che Vincenz ha acquirì diversas interpresas.
Tranter il 2012 e 2015 ha Raiffeisen Svizra tras cumpras da participaziuns stgaffì novs secturs da fatschenta en la valur da passa ina milliarda francs. Gestiun e controlla manglusa, negligientschas d'organisaziun ed ina cultura focusada sin ina persuna hajan chaschunà donns finanzials, surtut dentant in donn da reputaziun per l'entira gruppa Raiffeisen.
RR novitads 07:00
