Siglir tar il cuntegn

Header

chombra cun 3 letgs ed ina maisa, naginas autras mobiglias
Legenda: La quota d'agid social è restada stabila ils ultims 10 onns. Keystone
cuntegn

Svizra Quota d’agid social sin medem nivel sco 2005

L’onn passà han da quai da 262'000 persunas ni 3,2 pertschient da la populaziun svizra retratg agid social. Quai resulta da la statistica d'agid social da la Confederaziun. Dapi 10 onns publitgescha l’Uffizi federal da statistica las cifras actualas.

audio
Mezdi: 10 onns statistica d'agid social
ord Actualitad dals 04.04.2016.
laschar ir. Durada: 3 minutas 5 Secundas.

A Berna han ils responsabels tratg bilantscha e guardà en l'avegnir.

Dapi diesch onns datti ussa la statistica d'agid social. In project da la Confederaziun en stretga collavuraziun cun ils chantuns e las vischnancas. E gist lez sappian profitar fitg da quellas cifras, di il cusseglier guvernativ da Soloturn - Peter Gomm, ch'è era president da la Conferenza dals directurs chantunals socials.

Grazia a la statistica d’agid social èsi pussaivel d’identifitgar secturs nua ch’i brischa, nua ch’il privel da crudar en la povradad e il pli grond. Sin quella basa san ins lura sviluppar mesiras necessarias.
Autur: Peter Gommant. directur da la Conferenza dals directurs socials

La vista sur ils ultims 10 onns mussa resultads remartgabels. Uschia è bain il dumber da persunas che survegnan agid social creschì per 24'000 milli sin oz 262'000 milli persunas. Damai ch'il dumber da la populaziun en Svizra è creschida è la quota dentant restada tar 3,2%. Medem sco il 2005.

Damain cas en las metropolas

In svilup hai dà tar la repartiziun dals cas socials. Tenor Marc Dubach dal BFS è il dumber da persunas che survegnan agid social ì enavos en las citads grondas ils ultims diesch onns. Ellas aglomeraziuns ed en las regiuns ruralas è il dumber dentant creschì. Per el datti duas explicaziuns pussaivlas.

“Pussaivel è ch’ils pretschs da locaziun èn las citads grondas èn creschids e che persunas cun agid social han fatg midada en l’aglomeraziun ed en las regiuns ruralas. Per l’autra èsi era pussaivel ch’il martgà da lavur en las metropolas ha pudì absorbar meglier persunas cun nagina ni ina furmaziun mediocra.”

In connex hajan els remartgà tranter la furmaziun e la ristga da crudar en l’agid social. Entant ch’il dumber da persunas senza ina furmaziun supplementara saja sa diminuì en la populaziun saja il dumber creschì tar las persunas che survegnan agid social. Quai saja in cler indizi ch’il connex tranter la furmaziun e la retratga d’agid social saja s’accentuà ils ultims onns.

Ins sappia pia dir, ch'ina buna furmaziun supplementara saja sco in scut che protegi da vegnir dependents da l’agid social, di Dubach.

Legenda:
Persunas che survegnan agid social Uffizi federal da statistica

Il Grischun dumbra damain cas d’agid social

En egl dat era la situaziun dal Grischun. Là è la quota da persunas cun agid social sa reducida ils ultims diesch onns da 1,5% sin 1,2%. Tenor Peter Gomm haja quai da far cun il fatg, ch'il Grischun na saja betg confruntà uschè fitg da la deindustrialisaziun sco per exempel l’artg dal Giura. «Ultra da quai dettia el Grischun anc adina bleras plazzas da lavur per persunas cun pauca furmaziun. Per exempel el turissem.»

Per che la statistica d'agid social resti in impurtant instrument per la politica dovri dentant era adina puspè adattaziuns, di Marc Dubach. Enfin la fin da l'auter onn veglian els perquai integrar il sectur d'asil en la statistica. Quai per dar suatientscha a la situaziun actuala en quai sectur.

RR novitads 14:00

Artitgels legids il pli savens