Il BAG ha adattà il glindesdi sia glista dals pajais che valan sco ristg en connex cun il coronavirus. Da nov sa chatta era l’India sin questa glista. A partir d'immediat vala perquai – che persunas che vegnan da là en Svizra ston ir en quarantina.
Tenor il BAG èsi pussibel ch’era persunas vaccinadas, u persunas ch'han gia gì Covid-19 – s'infecteschan cun la nova varianta da l’India. Ord vista scientifica n’èsi dentant anc betg cler, sche la varianta indica è pli infectusa u pli privlusa ch’autras variantas.
Il pajais ha dentant dapi in pèr dis cifras da record – quai che pertutga novas infecziuns cun il coronavirus. E dapi dis mancan en ospitals oxigen medicinal e letgs. Persunas cun corona moran per part avant ospitals a Neu Dehli ed autras citads.
Ulteriurs pajais da nov sin la glista
Sco il BAG scriva vinavant sin sia pagina d’internet – figureschan da nov era pajais sco Egipta, Argentinia, Katar e Mexico sin la glista da ristg. Per quels pajais vala l’obligatori da quarantina cun returnar, a partir dals 3 da matg.