Siglir tar il cuntegn
Inhalt

Svizra Quant realistic è Rainman?

Autists u lur confamigliars enconuschan il fenomen: anc il mument ch’els cumenzan da discurrer dad autissem croda il tgavazzin Rainman. Il film american dal 1988 ha fat enconuschent il fenomen, das las persunas, che paran sco tut ils auters ma ch’èn dentant tut differentas che tut ils auters.

Legende: Video . abspielen. Laufzeit 02:18 Minuten.
Or da RTR dals 02.04.2016.

Rainman quinta l’istorgia da dus frars. In (Tom Cruise) ha difficultads da raps, l’auter (Dustin Hoffmann) è autist ed è in scheni da cifras. Frar numer 1 vesa sia schanza e maina a ses frar Raymond, l’autist, a Las Vegas en il casino. E là gudogna il duo – grazia ad il disturbi neurologic da l’autist.

Mo 100 «rainmans» en il mund

Autists cun talents uschia spezials datti tenor ils experts dad autissem mo var 100 sin tut il mund. Els vegnan nominads savants – cun quai ch’i san tant. Cun il di dad autissem internaziunal lessan las Naziuns Unidas ONU promover dentant l’encletga per tut las persunas pertutgadas da quest disturbi da svilup profund.

Il bigl illuminà tut en blau, la saria a Roma.
Legenda: Light it up blue - a Roma vegn rendì attent al di internaziunal dad autissem cun illuminar la Fontana dei Dioscuri. Keystone

Light it up blue

Perquai datti oz sin tut il mund occurrenzas ed infurmaziuns da las uniuns ed organisaziuns, che s’engaschan per las persunas cun disturbis autistics.

Sco signal è s’etablì ils ultims onns, ch’edifizis vegnan illuminads cun glisch blaua.

«Light it up blue» è perquai in dals mottos dals 2 dad avrigl.

Nagin purtret dal mund, ma ina stgatla plain tocs da puzzle

Umans cun in disturbi autistic han in autra percepziun dal mund. Lur tscharvè na riva dad elavurar las infurmaziuns uschia sco usità.

Perquai han els gronda fadia da vesair il mund sco insatge entir che fa segn. Els han difficultads da chapir sentiments e da communitgar cun auters.

Mattet a l'ur dad in lai che betta crappa.
Legenda: Viver en in agen mund - e tuttina han autistas ed autists da vegnir a fin cun las realitads e sfidas quotidianas. RTR I.Jaeger

In spectrum vast da disturbis - tantas fatgas sco pertutgads

Ils sintoms da quest disturbi sa mussan da pertutgà a pertutgà da furma differenta. Perquai discurr’ins ozendi dad in spectrum da disturbis autistics.

Tenor retschertgas actualas è pertutgada 1 persuna sin 100. En Svizra naschan mintg’on tranter 550 ed 800 uffants cun in disturbi autistic.

Autissem è in disturbi profund dal svilup e nagina malsogna. Perquai n’è el n’er betg curabel.

RR novitads 15:00