- La Banca naziunala svizra ha preschentà la nova bancnota da 10.
- Ordavant aveva ella emess novas notas da 50 e 20.
- La nova seria duai esser spezialmain greva da falsifitgar.
Sin la nova seria da bancnotas n'èn naginas persunas pli illustradas. L'entira seria è sut il motto «La Svizra multifara». Mintga bancnota represchenta ina part tipica da la Svizra. La nova bancnota da 10 mussa la Svizra che organisescha. Element principal è il temp.
Producziun cumplexa
Ina nova bancnota da 10 custa 40 raps per toc. Quai ha ditg la pledadra da la Banca naziunala svizra Silvia Oppliger. Cumpigliads en quest pretsch sajan ils custs da svilup, dal palpiri e da la stampa.
Dapli detagls na tradescha l'institut betg. Enconuschent è mo tge firmas che produceschan las bancnotas svizras. Ina da las firmas las pli impurtantas en quest connex è la fabrica da palpiri «Landquart». Quella producescha numnadamain il substrat or dal qual las bancnotas vegnan fatgas. Il substrat sa numna «Durasafe» e consista ord duas stresas da mangola.
Tranter questas duas stresas vegn in plastic liquid. Quai è il coc da la bancnota. Grazia a quest coc saja la bancnota era in zic pli stabila e dira cumpareglià cun la veglia bancnota da 10.
Terza bancnota nova
Suenter las notas da 50 e da 20 èsi la terza nota da la novavla seria da bancnotas che la banca naziunala emetta.. La nova bancnota da 10 vegn messa en circulaziun l'emna che vegn.
Sin la fin dal 2019 duain lura era las novas bancnotas da 100, 200 e 1000 esser en circulaziun. En media emetta la banca naziunala mintga 15 fin 20 onns novas bancnotas.
RR novitads 11:00
