Il concern d'energia argumentescha ses gudogn cun mesiras da spargn e meglras entradas. Plinavant saja il gudogn er in resultat da las fatschentas en l'exteriur che giajan bain. Uschia ha la vendita da la rait cun tensiun maximala a Swissgrid purtà al concern d'energia Axpo 163 milliuns francs.
L'onn da gestiun precedent, ch'è terminà la fin da settember, ha l'Axpo bain vendì in quart da main energia che l'onn avant. Tenor il concern è la prestaziun totala dentant creschida massivamain: Da 5,42 milliardas francs sin 5,57milliardas francs – pia per 150 milliuns francs.
Axpo attatga Confederaziun
Plinavant attatga il concern d'energia Axpo en il rapport da gestiun fermamain la Confederaziun pervi da la strategia d'energia. Ella saja fallada e l'uffizi federal per l'energia, BFE naìv. Uschia resentia il BFE in optimissem betg realistic pertutgant la segirezza dal provediment.
Il sbagl da l'Uffizi per energia saja ch'el giaja da quai anora che la Svizra possia importar avunda electricitad dals pajais vischinants era durant temps extrems. Dentant saja il privel dad in «Blackout» fitg real. Sco cumprova fa l'Axpo l'avis als 24 da schaner 2017. Lura sajan pliras ovras crudadas ora il medem temp en Germania ed en Frantscha. In «Blackout» haja be pudì vegnir evità grazia ad imports da la Scandinavia.
RR novitads 08:00