Siglir tar il cuntegn

Header

Navigaziun

Il president da l'Uniun purila svizra Markus Ritter ed il directur Jacques Bourgeois.
Legenda: Il president da l'Uniun purila svizra Markus Ritter ed il directur Jacques Bourgeois. Keystone
cuntegn

Svizra Purs svizzers sa fidan sin «Swissness»

Ils purs svizzers pon sulet surviver sch’els produceschan vinavant mangiativas d’auta qualitad. Ina impurtanta rolla gioghia la ordinaziun nova da «Swissness» scriva l’Uniun purila svizra.

La conscienza per products favuraivels als animals, persistents e sauns creschia adina pli fitg ha ditg il president da l'uniun purila Markus Ritter. Uschia creschia era la prontadad dals consuments en Svizra da cumprar products svizzers.

Ordinaziun da «Swissness» è entrada en vigur a partir dal 2017

Gronda speranza metta l’Uniun purila cunzunt sin l’ordinaziun nova da «Swissness» ch’è entrada en vigur a partir dal cumenzament dal onn nov. Uschia possia l’agricultura svizra sa posiziunar meglier sin il martgà. Impurtant saja che betg sulet la producziun succedia en Svizra ma er ch’ils products derivian da la Svizra. Senza reglas cleras saja l’agricultura en privel da daventar in furnitur da materias remplazzabel, ha ditg Ritter.

La pli impurtanta differenza è la tegnida d’animals adequata

Sco pli impurtanta differenza envers l’exteriur vesa il directur da l’Uniun purila svizra Jacques Bourgeois la tegnida d’animals adequata a lur natira sco era ils transports che sajan pli curts e l’economia locala che vegnia promovida uschia. Perquai sajan ils consuments era pronts da pajais in zic dapli, scriva Bourgeois.

Stgaffir contact cun ils consument

Cunzunt impurtant saja era da commerzialisar meglier ils products d’agricultura svizzers. Las famiglias purilas sajan dentant gia oz fitg innovativas e porschian ina gronda schelta da fitg differents products agriculs, accentuescha Ritter. Ina schanza vesa Ritter era en il dumber da fieras purilas che creschan puspè en la citads. Qua possia vegnir tgira il contact cun ils consuments ed uschia rinforzà la confidenza per ils products regiunals.

RR novitads 12:00