Siglir tar il cuntegn

Svizra Purs ed AVS duain survegnir dapli daners

Il Cussegl naziunal na vul betg spargnar tar l’agricultura. En la debatta per las finanzas da la Confederaziun ha el auzà il budget per divers posts da l’agricultura. Era ha la chombra gronda decis da vulair metter 442 milliuns francs en la cassa da l’AVS.

Legende: Audio AVS duai survegnir 442 milliuns francs tenor il Cusselgl naziunal abspielen. Laufzeit 2:14 Minuten.
2:14 min, Actualitad dals 30.11.2017.

Perquai ch'il pievel svizzer ha ditg «na» a la refurma da las rentas, èn 442 milliuns francs danvanz. Il Cussegl federal sco era il Cussegl dals chantuns vulan investir 295 milliuns en l’infrastructura da las viafiers e salvar l’autra part per egualisar debits. Il Cussegl naziunal percunter ha tut auters plans cun quels daners. El vul investir l'entira summa en la cassa da l’AVS. I saja la cassa che haja il pli grond basegn da daners, argumenteschan ils aderents.

La decisiun è crudada a favur da l'AVS – causa in'allianza tranter la PPS e la PS. Ils dus schefs da fracziun Thomas Aeschi da la PPS e Roger Nordmann da la PS han fatg ensemen la proposta per pudair metter ils raps en la cassa da l’AVS. Sche la PPS e la PS furman in'allianza n'han las ulteriuras partidas quasi nagina schanza pli. Ensemen han la PPS e la PS la maioritad da las vuschs en il parlament.

...è pauc intgantà da metter 442 milliuns en la cassa da l'AVS.
Legenda: Ueli Maurer ...è pauc intgantà da metter 442 milliuns en la cassa da l'AVS. Keystone
442 milliuns francs na salvan betg nossa AVS. Quai èn mo 1% da quels raps che vegnan duvrads en 1 onn.
Autur: Ueli MaurerCusseglier federal e minister da finanzas

Il minister da finanzas è pauc intgantà da quella decisiun. Tenor Ueli Maurer saja quai ina ficziun da vulair far vesair, ch’ins possia salvar la cassa da l’AVS cun quels daners. Quai sajan mo 1% da tut ils raps che la cassa da l’AVS dovra en 1 onn. Sco proxim è la balla tar il Cussegl dals chantuns.

Dapli per l’agricultura

La differenza tranter la chombra gronda e la chombra pitschna èn 114 milliuns francs. Il Cussegl naziunal vul investir en divers secturs da l’agricultura dapli ch'il Cussegl federal ed era il Cussegl dals chantuns.

Il Cussegl federal vul spargnar 93 milliuns tar l’agricultura ed il Cussegl dals chantuns anc ina giada 18 milliuns en pli. Per il cussegl naziunal na vegnia quai betg en dumonda. Da spargnar talmain bler saja senza perdun, ha manegià il pledader da la cumissiun Daniel Brélaz.

Il Cussegl naziunal cuntinuescha cun la debatta pertutgond il preventiv il glindesdi. Suenter è la balla puspè tar il Cussegl dals chantuns. Quel cuntinuescha cun la debatta il mardi.

RR actualitad 12:00