Siglir tar il cuntegn
Inhalt

Svizra Purs da zutger survegnan dapli subvenziuns

Perquai ch'ils purs da rava da zutger gudognan adina pli pauc augmenta il Cussegl federal danovamain las subvenziuns per ils ers. Retroactiv sin l'entschatta da l'onn survegnan ils purs pertutgads 200 francs dapli ed uschia en total 1'800 francs per hectara.

La racolta da ravas da zutger.
Legenda: Pir l'entschatta dal 2015 eran las subvenziuns per ils purs da ravas da zutger vegnidas auzadas. Keystone

Sco quai che l'uffizi federal d'agricultura ha communitgà vegnia uschia sustegnida la producziun svizra da ravas da zutger en in martgà cun pretschs permanentamain bass. Pir l'entschatta dal 2015 eran las subvenziuns vegnidas auzadas sin 1'600 francs per hectara.

Adina puspè in tema dispitaivel

Las ravas da zutger èn adina puspè in tema da dispita en la politica agrara. Perquai ch’il parlament aveva refusà las scursanidas dal budget aveva il cussegl puspè annullà ina reducziun dals pajament directs gia decidida.

Il 2014 avevan las fabritgas da zutger Aarberg e Frauenfeld elavurà bun 300’000 tonnas zutger, uschè bler sco anc mai. L’onn passà è quai però stà marcantamain pli pauc cun 230’000 tonnas.

RR novitads 12:00