Pulitas sfidas per la guardia da cunfin e la duana svizra

L’onn passà ha la guardia da cunfin e la duana svizra gì da sbatter cun l’unda da fugitivs e lur consequenzas. Ma er la cuntrabanda è s’augmentada.

Fugitivs arrivan en Svizra e vegnan controllads.

Legenda da maletgs: L'unda da fugitivs ha procura per lavur sin ils cunfins. Keystone

Il corp da la guarda da cunfin ha l’onn passà stuì reducir ils servetschs usitads pervi dal augment da la migraziun, quai ha ditg il schef dal corps Jürg Noth. Il focus da controlla è stà la primavaira cleramain en il chantun Tessin, l’atun perencunter en la vallada dal Rain en il chantun Son Gagl ed als cunfins cunter nord. Cun reparter da nov las forzas hajan ins pudì tegnair la situaziun sut controlla. Ma la fin da l'onn era il corps da la guardia da cunfin a ses limits, ha ditg Noth. Sch’il squitsch fiss anc s’augmentà, alura avess la guardia da cunfin anc clamà spezialists da la polizia militara. La planisaziun cun forzas da l’armada è in dals puncts da planisaziun da la guardia da cunfin. Ma definitiv na saja il mument anc nagut, ha ditg Notg. I saja sulet la planisaziun per situaziuns extraordinarias sco per exempel capità en l’Austria, nua ch’il dumber da fugitivs è s’augmentà entaifer curt temp sin millis migrants a di.

Il traffic da camiuns fa lavur

Sur 27’000 camiuns èn vegnids controllads ed il viadi en Svizra è vegnì scumandà, quai è in augment da 43%. Motivs eran mancos da segirtad, alcohol u il temp da conduir surpassà. Er la cuntrabanda è s’augmentada. En tut sajan sulet sin las plazzas aviaticas vegnidas trapladas bunamain 9’0000 persunas, en total prest 27’000. 14’000 novs cas da cuntrabanda professiunala èn vegnids registrads. Ina interpresa sto pajar suenter sur 100 milliuns francs per surpassaments tar la taglia sin la plivalur .

Sut il stritg èn vegnidas registradas l’onn passà 35.5 milliuns annunzias da duana, quai è in zic dapli che l’onn passà. Las entradas da duana èn dentant sa sminuidas per 8%.

RR novitads 15:00