Siglir tar il cuntegn

Svizra Psichiaters vesan «grond privel da reversiun»

En il process cunter l'assassin supponì da quatter persunas a Rupperswil han ils dus psichiaters preschentà lur giudicat. Ils experts attesteschan a l'accusà in grond privel da reversiun, tegnan quel dentant per terapabel.

Persunas da medias davant l'isch da la polizia chantunala da l'Argovia a Schafisheim
Legenda: Grond interess da las medias davant il post da polizia a Schafisheim, nua ch'il process cunter l'assassin da quatter persunas ha lieu. Keystone

En il process davart il murdraretsch da quatter persunas a Rupperswil han ils dus psichiaters preschentà lur giudicat. L'accusà haja planisà il delict minuziusamain ed i na dettia naginas circumstanzas che mitigieschian la culpa. Tenor omadus experts ha l'accusà in grond privel da reversiun. Independent in da l'auter tegnan els l'accusà dentant per terapabel, ina terapia na saja betg senza speranza. Per avair success stoppia ina tala terapia dentant esser fitg lunga.

Premissas per in internament per vita duranta n'èn betg dadas

Cun quests giudicats n'èn las premissas per in internament per vita duranta betg dadas. Per serrar davent in delinquent per vita duranta ston numnadamain dus experts independent in da l'auter attestar ch'in inculpà n'è per vita duranta betg terapabel.

Process cuzza quatter dis

Il process davart il murdraretsch da quatter persunas a Rupperswil ha cumenzà il mardi a Schafisheim en il chantun Argovia. Il process cuzza probabel quatter dis e la sentenzia vegn spetgada venderdi. L'assassin probabel da 34 onns ha curt avant Nadal dal 2015 mazzà a Rupperswil ina mamma, ses dus figls e l'amia dal figl pli vegl. Tenor l'acta d'accusaziun ha el plinavant malduvrà il figl pli giuven e mess en fieu la chasa da sias unfrendas. Tge chasti che la procura publica pretenda, n'è anc betg enconuschent.

RR novitads 12:00