PS sustegna referendum cunter lescha per servetsch d'infurmaziun

A sia radunanza da delegads a Son Gagl ha la Partida socialdemocratica svizra decidì cun 106 cunter 62 vuschs da suandar la suprastanza e cumbatter la nova lescha per il servetsch d'infurmaziun.

persunas ch'auzan il cederl da votaziun

Legenda da maletgs: In votum cler han delegadas e delegads da la PS chattà, malgrà la discussiun cuntraversa. Keystone

La Partida socialdemocratica svizra sustegna il referendum cunter la nova lescha per il servetsch d'infurmaziun. Suenter discussiun cuntraversa èn delegadas e delegads suandads il motto da la suprastanza: «encunter in stadi che fufrogna enturn e per la protecziun da la sfera privata. Ils arguments cunter las novas pussaivladads per il servetsch d'infurmaziun statal han prevalì.

Il referendum avevan ils Giuvens socialists e l'uniun "Na al stadi che fufrogna" lantschà cunter la nova lescha per il servetsch d'infurmaziun.

Beat Jans nov vicepresident dals Socialdemocrats

jacquelin badran e beat jans en gratulaziuns

Legenda da maletgs: Beat Jans è nov vicepresident dals Socialdemocrats svizzers. Jacquelin Badran aveva retratg la candidatura. Keystone

Delegadas e delegads han elegì il basilais Beat Jans sco nov vicepresident da la partida. Jans ha 51 onns ed è dapi l'onn 2010 en il Cussegl naziunal. Avant aveva la cussegliera naziunala Jacquelin Badran da Turitg retratg sia candidatura.

Beat Jans succeda uschia a Jacqueline Fehr, che challa cun la fin da l'onn.

RR novitads 14:00