Siglir tar il cuntegn
Inhalt

Svizra Protests cunter mesiras da spargn en la furmaziun

Cunter la politica da furmaziun e da finanzas chantunala han vers milli scolars demonstrà a Lucerna. Era en autras citads svizras hai dà protests.

Scolars tegnan in transparent cun l'inscripziun «Bei der Bildung sparen? Huere Seich.»
Legenda: Scolars cunter mesiras da spargn en la furmaziun. Keystone

Vers milli scolars èn sa radunads mesemna a Lucerna per protestar cunter la politica da furmaziun e da finanzas dals chantuns. Tenor indicaziuns da la polizia, sajan vers 1’000 scolars chaminads paschaivlamain dal Helvetiaplatz enfin la chasa da la regenza. Sche furmaziun possia propi esser massa chara, è stà ina dumonda centrala dals scolars.

Pli pauc resun en il rest da la Svizra

Era a Turitg, Basilea, Aarau e Genevra han scolars demonstrà cunter las mesiras da spargn en la furmaziun. Ils organisaturs n’han però betg pudì mobilisar uschè bleras persunas sco a Lucerna. A Turitg èn pliras tschient persunas sa radunadas sin il Bürkliplatz ed a Basilea circa 80 persunas sin il Barfüsserplatz.

Dapli vacanzas sco mesira da spargn

Inizià ils protests en pliras citads svizras han scolars da Lucerna. Sco mesira da spargn era l'atun 2016 vegnì decidì da prolungar las vacanzas en las scolas chantunalas da lucerna per in’emna. Sco consequenza da las tractativas da budget en il parlament chantunal, han scolars da Lucerna adina puspè organisà demonstraziuns.

RR novitads 16:00