Proteger giuvenils meglier da cuntegns medials nunadattads

Avant bun in onn ha il Cussegl federal constatà che giuvenils en Svizra n’èn betg protegids avunda da films e gieus da computer nunadattads. La critica: Providers da telecom e d’internet n'adempleschian betg suffizientamain lur obligaziun da proteger la giuventetgna. Uss agescha la branscha da sez.

Gieus da computer ch'illustreschan violenza a moda explicita - qua in maletg da «Grant Theft Auto V».

Legenda da maletgs: Betg adattà per tut il public: Gieus da computer ch'illustreschan violenza a moda explicita - qua in maletg da «Grant Theft Auto V». Keystone

Avant in onn aveva il Cussegl federal crititgà la branscha da telecommunicaziun Svizra. Ella na fetschia betg avunda per la protecziun da giuventetgna. Da lez temp aveva il cussegl annunzià d’evaluar fin la stad 2016, schebain ina regulaziun federala en furma da restricziuns d’access e da furniziun fiss ina pussaivladad da meglierar quest fatg.

La branscha da telecom svizra ha uss da sasez agì pertutgant la protecziun da giuvenils. Pliras interpresas e l’associaziun da la branscha han lantschà in’iniziativa e vulan fin la fin da l’onn preschentar mesiras concretas.

Las finamiras da l’iniziativa èn resumond:

  • Porscher pussaivladads da restrenscher l’access a servetschs da video-on-demand
  • Bloccar l’access a pornografia d’uffants
  • Porscher infurmaziuns davart software per la protecziun d’uffants e giuvenils
  • Promover il barat d’infurmaziuns cun uffizis ed interpresas interessadas

Er purschiders pitschens duain sa participar

Elavurà l’iniziativa han l’Associaziun svizra da telecommunicaziuns (asut) ensemen cun Swisscom, Salt, Sunrise e UPC (Cablecom). Questas organisaziuns collavuran plinavant cun il post da coordinaziun federal per il cumbat cunter criminalitad en l’internet (KOBIK).

L’iniziativa pon suttascriver tuttas interpresas da telecom. Ina finamira èsi da persvader pitschens providers da sustegnair l’iniziativa.

RR novitads 14:00