Protecziun da muntaneras - Confederaziun rinforza protecziun cunter il luf - Novitads

Protecziun da muntaneras Confederaziun rinforza protecziun cunter il luf

Autur: Dominik Hardegger

En vista al fatg che la populaziun dal luf en Svizra crescha e per reducir ils donns vi dals animals da niz augmenta la Confederaziun uss il sustegn finanzial per proteger las muntaneras sin las alps. Tut en tut vegnan mess a disposiziun per questa stad ulteriurs 5,7 milliuns francs.

Possessuras e possessurs d'animals da niz e dad alps survegnan da nov la pussaivladad da dumandar ils chantuns per agid immediat. 80% dals custs surpiglia lura la Confederaziun, sco che l'Uffizi federal d'ambient communitgescha. Mesiras pussaivlas pon tranter auter esser dapli persunal d'agid u alloschis mobils sin alps perifericas.

Per pudair ir enturn pli flexibel cun lufs elavura il parlament il mument in nov sboz per midar la lescha da chatscha.

Actualmain vivan en Svizra radund 150 lufs en almain 15 trieps, scriva l'Uffizi federal d'ambient BAFU. Grazia a la protecziun da muntaneras, uschia la Gruppa Luf Svizra, stgarpia il luf pli paucs animals da niz. Per luf sajan en media vegids stgarpads sis animals da niz.

Tar lufs singuls che chaschunan donns considerabels vid animals da niz pon ils chantuns lubir en atgna cumpetenza da sajettar quels animals. Per intervenziuns en in triep sto il BAFU dar la lubientscha.