La midada principala prevesa cunzunt da nizzegiar meglier il potenzial da lavurants svizzers. Concret vulan ins promover l'intermediaziun da persunas ch'èn en tschertga da lavur. La mesira per cuntanscher la finamira è d'obligar ils patruns d'interpresas d'annunziar plazzas libras als centers d'intermediaziun da lavur uffzials (öAV) avant che scriver or ellas uffizialmain. Pertutgads èn patruns d'interpresas en branschas cun ina tscherta quota da dischoccupaziun.
L'obligaziun va en vigur per l'entschatta fanadur 2018. En in emprim pass vegn ella introducida per branschas cun ina quota da dischoccupaziun da sur 8%. E davent dal 2020 vegn ella schluccada sin 5%.
Sustegn sur l'intermediatur da lavur
Durant tschintg dis da lavur duain las infurmaziuns davart plazzas libras annunziadas esser accessiblas mo per persunas ch'èn registradas tar l'intermediaziun da lavur uffiziala (öAV). Uschia han las persunas en tschertga da lavur in avantatg da temp sin la fiera da lavur: els pon s'annunziar spert ed ord atgna iniziativa. Plinavant surdat l'öAV entaifer trais dis da lavur dossiers da persunas adattadas als patruns. A basa da questas indicaziuns envidan ils patruns pussaivels candidats ad intervistas u ad in test da qualificaziun.
Integraziun da fugitivs
Plinavant realisescha il Cussegl federal uschia la decisiun dal parlament che fugitivs renconuschids e persunas ch'èn provisoricamain cun certificat F en Svizra duain era vegnir annunziadas tar l'öAV sch'els vegnan sustegnids d'agid social.
RR novitads 15:00