Siglir tar il cuntegn
Inhalt

Svizra Project general per segund tunnel dal Gottard sin maisa

Il Cussegl federal ha approvà il project general per in segund tunnel d’autos tras il Gottard. Quel definescha las valurs directivas dal project. Planisà è in tunnel che duai ir 70 meters parallel tar il tunnel existent. L’emprima badigliada duai esser il 2020.

L'entrada existenta en il tunnel dal Gottard duai restar la medema.
Legenda: L'entrada existenta en il tunnel dal Gottard duai restar la medema. Keystone

Ils portals dal tunnel existent vegnan mantegnids vinavant e duain era servir al tunnel nov, quai tant a Göschenen sco era ad Airolo. Era las basas principalas per il mantegniment dal tunnel vegnan en futur ad esser responsablas per omadus tunnels, scriva l’Uffizi federal per vias (ASTRA). Era surpigliads e nizzegiads per omadus tunnels duain vegnir ils tumbins da ventilaziun existents. Sut la via dal tunnel nov vegn construida ina galaria per ina lingia industriala, nua che per exempel ina lingia d’auta tensiun po vegnir tratga en.

Material ord il tunnel vegn duvrà per renaturar il lai

Tenor ils plans dal ASTRA vegnan durant las lavurs per il segund tunnel exchavà radund 6,3 milliuns tonnas material. Cun radund 2,8 milliuns tonnas material duai il Lai d’Uri vegnir renaturà. Da l’autra vart dal tunnel ad Airolo duai radund 2,5 tonnas material vegnir duvrà per modellar la cuntrada e per part per cuvrir l’autostrada.

Il project uss sin maisa è l’emprim pass

Il mument è sulet vegnì preschentà il plan general per il project, pia l’emprima etappa suenter las votaziuns dal pievel il favrer 2016. Quest plan general cuntegn sulet las valurs directivas. Tar l’elavuraziun vegnan uss ils chantuns Uri e Tessin sco era las vischnancas en il nord ed il sid dal tunnel cumpigliadas. Sche quai dat protestas vegnan quellas tractadas pir suenter ch’il plan detaglià vegn preschentà dal ASTRA la primavaira 2018. Cura che las lavurs duain cumenzar, dependa dal temp da planisaziun e da la procedura da recurs.

En il meglier cas cumenzan las lavurs il 2020

En il meglier cas pon las lavurs cumenzar il 2020, alura pudess la construcziun da basa esser a fin il 2025. L’avertura fiss uschia il pli baud la fin dal 2027. Il tunnel existent pudess vegnir sanà tranter ils onns 2028 e 2030. Silsuenter pudess il traffic vegnir manà tras omadus tunnels, ma la capacitad na duai uschia betg vegnir augmentada.

RR novitads 12:00