Siglir tar il cuntegn
Inhalt

Svizra Project da taglia 17 - critica da dretg e da sanester

La nova versiun da la revisiun da la taglia sin interpresas provochescha tant tar la dretga sco era tar la sanestra per reacziuns negativas.

La staziun da Zug da notg.
Legenda: Betg mo a Zug teman ins che las interpresas internaziunalas pudessan bandunar la Svizra. Keystone

Dapi paucs dis èn ils puncts principals per la nova revisiun da l'imposiziun da taglia sin interpresas enconuschents. Cler è: Cumpareglià cun la davosa revisiun, l'uschenumnada USR3 che ha fatg naufragi a l'urna il favrer, cuntegna il project da taglia 17 pli paucs instruments per cumpensar ils privilegis da taglia che las interpresas da l’exteriur duain perder. Propi cuntents para dentant nagin dad esser cun il nov project.

I dovra correcturas

La proposta dal Cussegl federal na cuntenti betg, di la cussegliera naziunala socialdemocrata Susanne Leutenegger-Oberholzer. Anc adina vegnian las interpresas deliberadas a moda nungiustifitgada da las taglias, quai sin donn e cust dals chantuns e da las vischnancas e la fin finala da la classa mesauna. I dovri perquai correcturas dal project da taglia 17.

Supplements da famiglia spartan

Ch'i dovri talas, dentant en ina tut autra direcziun, manegia era la cussegliera naziunala Magdalena Martullo da la PPS. Ella crititgescha ch'ins vul augmentar la taglia sin las dividendas. Ed era ch'ins ha stritgà ord la lescha la pussaivladad per las interpresas da trair giu in tschains fictiv sin l'agen chapital giaja en la faussa direcziun. In signal fallà è per ella era ch'ins veglia entaifer la revisiun da la taglia d'interpresas pachetar viaden in augment dals supplements da famiglia minimals da 30 francs.

Almain 100 francs

Quai vesa Susanne Leutenegger-Oberholzer auter. Prest 60 pertschient hajan detg na al project precedent, gist perquai che lez saja stà pauc transparents ed insumma betg equilibrads. Da vulair cuntanscher quai cun in augment dals supplements da famiglia saja en urden. 30 francs dapli na tanschian dentant betg. Per ch’i haja effect stoppia quai esser almain 100 francs.

Mo enfin che quai vegn decidì vai anc in amen. Il parlament tracta il project da taglia 17 numnadamain il pli baud la primavaira che vegn.

RR actualitad 07:00