Prognosas pli exactas

Quai empermetta il nov model «Cosmo E» da Meteo Schweiz. Quel na producescha betg mo ina prognosa per di sco fin qua, mabain 21 differentas per mintga di.

chametg la notg e cazzolas da vitgs en la cuntrada

Legenda da maletgs: Il nov model duai cunzunt er gidar a prognosticar meglier urizis e stemprads. Keystone

Mussan tut las 21 prognosas la medema aura èsi fitg probabel che l'aura vegn uschia. Sch'i dat dentant plirs differents scenaris pon ils meteorologs dir cun il nov model quant probabel ch'in scenari è, pia p. ex. quant probabel ch'i vegn a plover u betg.

Quai è tenor Marco Arpagaus da Meteo Schweiz cunzunt er in avantatg tar ils uschenumnads alarms da l'aura.

In urizi u in stemprà po vegnir prognostitgà cun la probabilitad correspundenta gia plirs dis avant, quai che dat dapli temp a la glieud per sa preparar.

D'avantatg per il Grischun - prognosas regiunalas pli exactas

Ils model che Meteo Schweiz duvrava fin qua fascheva prognosas per ina surfatscha da radund 49 kilometers quadrats, il nov dentant be per ina surfatscha da radund 4 kilometers quadrats. La surfatscha pli pitschna pussibilitescha prognosas pli exactas.

«  Cunzunt per regiuns alpinas sco il Grischun è quai tut in'autra liga da prognosas. »

Marco Arpagaus
meteorolog tar Meteo Schweiz

Er SRF Meteo ha interess

Tenor Thomas Bucheli da SRF Meteo sajan ins gia sa cunvegnids cun Meteo Schweiz d'empruvar ora il nov model e lura decider schebain ins veglia tut tenor pussaivladad cumprar tschertas licenzas. Bucheli è da l'avis ch'il nov model possia porpi purtar meglieras prognosas, cunzunt per avertir la glieud da stemprads, urizis ed orcans.

RR actualitad 08:00