Siglir tar il cuntegn
cuntegn

Svizra Prognosas pauc optimisticas per il turissem svizzer

Il turissem svizzer na vegn betg or da la crisa, quai ha ditg il directur da Svizra Turissem, Jürg Schmid avant las medias. Las pendicularas hajan registrà l'enviern passà ina digren da 6%. En cumparegliaziun cun ils davos 4 onns saja schizunt sa mussà ina digren da passa 10%.

Jürg Schmid durant la preschentaziun avant las medias.
Legenda: Jürg Schmidt avertescha che mintga 4 giast da l'Europa manchia. Keystone

Las pernottaziuns da giasts da l'Europa èn tschessadas dapi il 2010 per 23%. Quai veglia dir che mintga quart giast da l'Europa manchia, avertescha Schmid. Er il dumber da pernottaziuns da giasts da la Russia ha el accentuà. Dapi il 2013 èn quellas sa sminuidas per 40%.

Ils indicaturs a lunga vista na vesa er betg ora grondius.
Autur: Jürg Schmmiddirectur da Svizra Turissem

Tut en tut vesian ils indicaturs a lunga vista er betg ora grondius. Pertgè cun il ferm franc, che vegn probabel anc a restar per in temp, restan viadis en Svizra chars per persunas da l’exteriur. Plinavant dettia il pitschen svilup da l’economia en numerusas regiuns mundialas e la situaziun dal terrorissem en l’Europa strusch impuls per ina midada da quest trend.

57 milliuns francs per la stagiun da stad

Per la stagiun da stad vegninta emprova Svizra Turissem però da derasar optimissem. Uschia quinta la prognosa da pernottaziuns en hotels cun in plus da 1,5%, quai surtut grazia a giasts svizzers. Per il marketing da stad vul Svizra Turissem investir 57 milliuns francs.

Strategia da 3 stgalims

Sco via ord la miseria proponan ils turistichers ina strategia da 3 stgalims. Uschia duai surtut vegnir pledentà gruppas da clients cun daners, sco per exempel da pajais en il nord da l’Europa. Plinavant vul Svizra Turissem promover il turissem individual sin ils martgads da l’Asia e l’America. E sco terz punct duain ils Svizzers vegnir animads da far vacanzas aifer ils cunfins.

RR novitads 12:00