Siglir tar il cuntegn

Header

figurettas cun costums tradiziunals svizzers e tibas avant la bandiera svizra
Legenda: Per pudair vender ils products cun il label «Swiss made» definescha la nova lescha reglas pli restrictivas che fin qua. Keystone
cuntegn

Svizra Products svizzers vegnan anc pli «svizzers»

Suenter onns da discussiuns e midadas va l'uschènumnada «lescha da Swissness» en vigur. Cun reglas pli restrictivas per il label «Swiss made» vul ella proteger firmas ed interprendider che produceschan vairs products svizzers.

Tschigulatta ed uras - quai èn products svizzers da renum mundial. Tgi che po pia dir, che ses product saja svizzer, profitescha da quai e venda dapli. Però vegnan ozendi ils pli paucs products producids 100% en Svizra e cun ressursas 100% svizras.

La lescha da «Swissness» differenziescha differentas reglas per victualias e per products industrials:

  • Tar victualias, sco per exempel la tschigulatta, ston almain 80% da las ingredienzas esser da la Svizra, ed il product sto vegnir producì en Svizra.
    Sco excepziun valan ingredienzas che na creschan gnanc en Svizra, sco per exempel il cacao per la tschigulatta.
  • Tar products industrials, sco per exempel las uras, ston almain 60% dals custs da producziun esser en Svizra.
    Sco excepziun valan materias ch'i na dat betg en Svizra, sco per exempel l'aur per uras.

Lunga via a la lescha

Sur da la lescha e las definiziuns da detagl ha il parlament federal debattà pliras giadas ils ultims onns avant d'approvar l'uschènumnada lescha da «Swissness». Questa è ida en vigur cun Bumaun 2017.

Ulteriuras midadas da leschas

  • Ils curs per possessurs da chauns n'èn betg pli obligatorics sin nivel federal.
  • Babs ord concubinats spartgids ston pajar dapli aliments.
  • Bancas svizras barattan automaticamain datas da clients da l'exteriur cun las autoritads da l'exteriur.

RR actualitad mezdi 11:00