Products da bio han conjunctura auta

Cumprar products da bio è en il trend: Tenor Bio-Suisse è la svieuta cun products da bio sa dublegiada entaifer ils ultims diesch onns. Il bestseller dals products da bio è l'ov. Mintga quart ov che vegn consumà oz saja numnadamain bio.

ov da bio

Legenda da maletgs: Mintga quart ov che vegn oz consumà en Svizra è in ov da la producziun biologica. Keystone

En l'onn passà ha la svieuta cun products da bio cuntanschì 2,23 milliardas francs, uschia Lukas Inderfurth, pledader da medias da Bio-Suisse. «Ils products da bio han uschia fatg ora 7,7 pertschient da l'entira svieuta da vivondas.» El è persvas ch'ins na sappia betg pli mo discurrer d'in trend da bio. Plitost sa tractia tar blers consuments d'ina tenuta. Er tar ils dus gronds detaglists svizzers è la svieuta cun products da bio creschida il davos onn.

Passa 30 differents labels da bio

Simpel n'èsi dentant betg per il consument. Total dettia passa 30 differents labels da bio, declera Corina Gyssler dal WWF. «La fin finala è dentant mintga label da bio meglier ch'in product convenziunal, dal qual ins n'haja insumma nagina idea cun quants pesticids ch'el saja vegnì tractà e sut tge cundiziuns ch'el saja vegnì producì.»

En general possian ins distinguer tranter labels che sa basian sin las directivas da la Bio-Suisse e quels che sa basian sin l'ordinaziun da bio da l'Uniun europeica. Las directivas da la Bio-Suisse sajan pli strictas che quellas da l'UE. Il label dal brumbel portan ils products da Bio-Suisse. Plinavant datti er in label da bio da l'UE ch'è verd cun stailas alvas che furman in fegl. Ensemen cun la Push (fundaziun svizra per la pratica da l'ambient), la Helvetas e la fundaziun per la protecziun da consuments ha il WWF valità singuls labels tenor tscherts criteris. Uschia han els elavurà in cussegliader da labels.