Siglir tar il cuntegn
Inhalt

Svizra Procura publica federala surpiglia cas da Sonko

L'anteriur minister da l'intern da la Gambia sa chatta en arrest d'inquisiziun. L'organisaziun nunguvernamentala Trial International ha accusà el d'esser responsabel per divers crims.

Purtret da la statua da la Giusticia.
Legenda: Il cas da l'anteriur minister da l'intern da la Gambia vegn uss intercurrì da la procura publica federala. Keystone

Il cas dal anteriur minister dal intern da la Gambia Ousman Sonko surpiglia uss la procura publica federala. Ella ha avert in'inquisiziun. Il suspect da crims cunter l’umanitad na possia betg vegnir exclus, perquai che tals cas sajan en la cumpetenza federala surpiglia ella il cas dal chantun Berna, quai scriva la procura publica federala.

Sonko aveva dumanda asil en Svizra

L’anteriur minister dal intern da la Gambia Sonko aveva dumandà il november asil en Svizra. Il mument sa chatta el en arrest d’inquisiziun, quai per almain trais mais. Ad el vegn rinfatschà d’esser responsabes per plirs crims cunter l’umanitad en Gambia. En ils trais mais vul la procura publica ussa investigar sch'i dat insatge da metter a dies a Sonko. Pir suenter las investigaziuns vul la procura publica puspè infurmar.

Trial International ha denunzià Sonko

Sonko era vegnì fermà il schaner en il chantun Berna perquai che l'organisaziun nunguvernamentala Trial International aveva denunzià Sonko. L'organisaziun accusa el d'esser responsabel per blessuras corporalas, sforz e privaziun da la libertad. Crims cunter la umanitad n'haja l'organisaziun betg accusà.

RR novitads 14:00