Siglir tar il cuntegn
Inhalt

Svizra Procrastinaziun - spustar sin damaun, e damaun, e damaun...

Sch'il spustar sin damaun na vegn era betg fatg damaun e fa temair per l’atgna existenza, lura discurr'ins da la procrastinaziun. Nus avain discurri cun pertutgads.

Spustar sin damaun e damaun e damaun e damaun...
Legenda: Procrastinaziun Spustar sin damaun chaschuna mo anc dapli lavur che quai ch'ins ha insumma gia. SRF

Mintgin da nus ha gia fatg quai. Spustar rauba sin damaun u ch’ins fa las chaussas l’ultim mument. Saja quai scriver mails, manar davent las buttiglias da vaider u telefonar enavos ad insatgi. Però tut quai è normal. Mintgatant èsi perfin positiv, perquai ch'ils problems sa schlian da sasez.

In problem vegn la procrastinaziun, sche quella controlla il mintgadi. Sche las consequenzas dal supustar han ina influenza negativa sin la vita. Quai po esser en scola, cun finanzas u en amicizias.

Igl è paradox

La tema da far insatge fauss, da survegnir ina nauscha nota u valitaziun, è pli gronda che la tema da betg survegnir ina valitaziun. E sch’ins na fa betg quai ch’ins duess far, lura hai en sasez anc pli grondas consequenzas.Però tuttina na fan ins betg quai ch’ins stuess, era sch’ins vul vairamain.

Pertutgads raquintan

Temair per l’existenza

Causa che Gian* n’ha betg tegni en termins, ha el gì per ses studi d’architectura il dubel uschè ditg sco normal. Ed uss ha el pers sia plazza sco architect pervi da quai. En sasez fa Gian* buna lavur, ma el na vegn betg da tegnair en termins, era sch'el vuless en sasez.

 Pertutga da procrastinaziun. Maletg simbolic.
Legenda: Pertutgà da procrastinaziun. Maletg simbolic. RTR C. Albin
Jau hai pers mia lavur pervi da la procrastinaziun ed hai survegnì problems finanzials.
Autur: Pertutgà da procrastinaziunArchitect

Problems finanzials

Andri* ha la procrastinaziun plitost cun raubas administrativas, sco cun pajar quints e far la taglia. Quai è vegnì uschè enavant che Reto* n'ha mai pajà la taglia da sia firma. Perquai è la firma vegnida valitada sin ina summa che na correspunda betg al gudogn da la firma. Quai era pertge che Andri* n'ha betg pudì surmuntar sasez da scriver quints a ses clients. Igl è in circul vizius.

Pertutga da procrastinaziun. Maletg simbolic.
Legenda: Pertutgà da procrastinaziun. Maletg simbolic. RTR C.Albin
Cun in advocat hai jau pudì salvar la situaziun l'ultim mument...
Autur: Pertutgà da procrastinaziunManager dad events

Davent na va quai betg

Duri* di ch'ins haja procrastinaziun da pitschen ensi. Già a scola sent’ins quai. El di ch'el veglia en sasez far tut perfetg, però ch'el na vegnia betg da far las chaussas. Duri* na craja betg che quai va davent. Però ins possia controllar per exempel cun ina gruppa d’agid. Il "Selbsthilfecenter, il link avra en ina nova fanestra" a Turitg pordscha ina tala gruppa.

Pertutga da procrastinaziun. Maletg simbolic.
Legenda: Pertutgà da procrastinaziun. Maletg simbolic. RTR C. Albin
Procrastinaziun ha era da far cun sur-perfecziunissem.
Autur: Pertutgà da procrastinaziunBanchier / furner

* nums èn vegnids midads da la redacziun

RR Actualitad bunura 06:00