Tut en tut sajan ils problems en la zona da l'euro però survesaivels e main difficils che tar sumegliants cas avant paucs onns. Quai ha ditg Widmer-Schlumpf al Swiss International Finance Forum a Berna.
Ils pajais sco la Spagna u il Portugal, ch'han era gì da cumbatter cun crisas, sajan oz relativamain stabils e la Banca centrala europeica haja surpiglià ina rolla pli impurtanta, uschia la ministra da finanzas.
La Svizra haja in interess ch’er l’euro saja ferm. La politica saja en stretg contact cun la Banca naziunala. Quella saja preparada sin tuttas eventualitads e vegnia a decider las dretgas mesiras il dretg mument.
François Hollande spera sin cuntinuaziun dals discurs
Il president da la Frantscha François Hollande spera entant anc adina sin ina cuntinuaziun da las discussiuns cun la Grezia. Tenor el saja ina soluziun anc adina pussaivla.
Era da quest avis è il cummissari d'economia da l'UE, Pierre Moscovici. Ins saja be paucs centimeters davent dad ina schliaziun.
Europa po far quint cun sustegn da la China
La China haja in interess da vesair in’Europa che funcziuna, in'Uniun europeica unida ed in ferm euro, ha il primminister ditg. Perquai possia l'Europa far quint cun il sustegn da la China.
La chanceliera tudestga Angela Merkel ha ditg en il presidi da sia partida CDU che la balla saja uss tar la Grezia per chattar ina via or da la crisa. Quai han participants ditg a l'agentura Reuters.
RR novitads 12:00