Siglir tar il cuntegn

Svizra Pro e Contra iniziativa «economia verda»

L’iniziava dal pievel «Per in’economia duraivla ed effizienta areguard la gestiun da las resursas», l’uschenumnada iniziativa «Economia verda» pretenda che la Confederaziun, ils chantuns e las vischnancas prendian mesiras per che l'economia dovra las resursas da noss planet a moda effizienta.

purtret d'in vitg, en il lontan sin in crest ina turbina d'aria
Legenda: Ils 25 da settember votescha il pievel svizzer davart l'iniziativa «economia verda». Keystone

Enfin l'onn 2050 duai la Svizra reducir ses consum da resursas uschè fitg ch'ella na surpassa betg pli la capacitad natirala dal mund. Oz duvrain nus varga 3 giadas uschè bleras resursas. E tenor il barometer da votaziun da la SSR da venderdi passà giauda quella grondas simpatias ella populaziun. 61 pertschient dals dumandads avessan mez avust ditg gea al l’iniziativa dals verds.

In signal d'alarm per ils adversaris. Els teman ina veritabla dictatura verda sche l'iniziativa vegniss approvada.

Per Babette Sigg, la presidenta dal Forum da consuments è cler: In gea al l’iniziativa «economia verda» mainia a dapli leschas e regulaziuns che pertutgian la vita dad in e scadin. I spetgia nus tuts ina veritabla dictatura verda.

Vus pajais dapli per las victualias, l’abitaziun ed era per il traffic public. Alla fin pajais vus en tut ils secturs da la vita dapli pervia da l’iniziativa
Autur: Babette SiggForum da consuments

Las consequenzas da l'iniziativa sentissi era l'economia svizra. «Lezza è gia oz sut squitsch. E sch’ils products vegnan anc pli cars è la consequenza logica che anc dapli persunas vegnan a far lur cumpras da l’autra vart dal cunfin.» E quai periclitassi lura bleras plazzas da lavur en Svizra, tema Sigg.

Quai na saja nagut auter ch'ina campagna primitiva dals adversaris che veglian far tema, respunda il cusseglier naziunal verd, Bastien Girod.

I na va betg per producir ni consumar pli pauc. La finamira è da producir meglier. I va vairamain da promover las tecnologias existentas che lubeschan a nus da reducir la polluziun e las grevezzas per l’ambient.
Autur: Bastien Girodcusseglier naziunal verd

La Svizra saja ditg stada ina piuniera en il sectur da la protecziun da la natira e da las resursas. Mo oz sajan auters pajais bler pli lunsch. Lur iniziativa veglia midar quai ed il medem mument far fit l'economia svizra per il futur. «Sin nivel internaziunal crescha il martgà da cleantech il pli fitg. Qua sa l’economia svizra profitar grazia l’iniziativa. Ed era tar resursas che na creschan betg en svizra augmenta l’iniziativa l’independenza da l’economia svizra e protegia quella da schocs da pretsch.»

Mo per cuntanscher las finamiras da l'iniziativa na dovri naginas prescripziuns novas, crititgescha Babette Sigg.

Jau sun persvadida che la Svizra è uschè innovativa e che l’ambient economic po sviluppar uschè blera creativitad che fitg bler vegn a sa dar senza che nus scrivain quai en la Constituziun, senza che nus sfurzain insatgi, mabain che quai sa schlia da sasez grazia a la forza innovativa en noss pajais.
Autur: Babette SiggForum da consuments

I dettia adina da quels che na sa laschian betg persvader. Els na veglian dentant betg sfurzar quella glieud da midar lur cumportament. Mintgin duai astgar viver co el vegli, uschia Sigg.

Gist quella tenuta da 'laissez-faire' crititgescha Bastien Girod.

I va vairamain per la dumonda tge che nus laschain enavos per las generaziuns futuras, noss uffants. Els vegnan a viver en quai mund e la dumonda è: Tutga la Svizra tar quels pajais che na fan nagut u sa participescha la Svizra a quellas stentas e surpiglia ella responsabilitad?
Autur: Bastien GirodCusseglier naziunal verd

RR actualitad bunura