Siglir tar il cuntegn
Inhalt

Svizra Prevenziun da mulestas sexualas en il parlament

Nua è il cunfin tranter in flirt e mulesta sexuala? Suenter diversas reproschas da mulestas sexualas en il parlament a Berna, ha Ia delegaziun administrativa dal parlament elavurà mesiras per la prevenziun da mulestas sexualas.

Legende: Audio Mezdi: Mesiras pervi da mulestas sexualas en il parlament abspielen. Laufzeit 02:34 Minuten.
02:34 min, Actualitad dals 13.12.2017.

Ensemen cun ils schefs da fracziun ha la delegaziun administrativa dal parlament decis da metter a disposiziun a las parlamentarias ed als parlamentaris in post spezialisà independent per cussegliaziun en connex cun mulesta sexuala.

I saja in pass impurtant e necessari di la vicepresidenta dal Cussegl naziunal e commembra da la delegaziun administrativa Marina Carobbio.

Vicepresidenta dal cussegl naziunal.
Legenda: Marina Carobbio Guscetti Vicepresidenta dal Cussegl naziunal. Keystone
Ils cunfins tranter in flirt e mulesta sexuala è ina problematica che pertutga tut la societad e quai duai era occupar in parlament modern.
Autur: Marina Carobbio Guscettivicepresidenta dal Cussegl naziunal

ll post da cussegliaziun vegn pajà dal parlament e custa 3600 francs per onn. A disposiziun stà quel davent dal schaner 2018. Suenter 1 onn vegn fatg ina evaluaziun da la situaziun e decis co cuntinuar.

La differenza tranter in flirt ed ina mulesta sexuala

La delegaziun administrativa ha fatg ina glista, il link avra en ina nova fanestra che mussa la differenza tranter in flirt e mulesta sexuala. Tar in flirt èn duas persunas d'accord cun il svilup da la situaziun ed ils cunfins persunals vegnan respectads. Sche l'emprova d'ina avischinaziun vegn però mo dad ina vart e n'è betg giavischada da l'autra persuna u degradescha e permalescha quella, lura è quai mulesta sexuala.

Marina Carobbio deplorescha che talas mesiras fan da basegn ozendi. Per reagir ed elavurar mesiras na saja mai memia tard. Ina funcziun impurtanta survegnan era ils schefs da fracziun. Els hajan da discurrer cun lur commembras e commembers e da guardar che mulesta sexuala vegnia discutada ed evitada en la cultura tranter parlamentarias e parlamentaris.

La debatta sur da sexissem en il parlament

La discussiun davart la mulesta sexuala en il parlament ha cumenzà cun il cas Yannick Buttet. Il cusseglier naziunal da la PCD è vegnì denunzià pervi dad in cas da stalking envers ina ex-amia. Sin quai han diversas parlamentarias e parlamentaris fatg enconuschent cas da mulesta sexuala en il parlament.

RR actualitad 12:00